District tinah Republic Day lawm a ni

Nimin khan Mizoram hmun hrang hrangah Republic Day vawi 75-na lawm a ni. District khawpuiahte chuan bawrhsapte khuallian niin, hnam puanzar an pawt pharh. Civil sub-division ṭhenkhat bakah, sorkar hmun pawimawh ṭhenkhatahte hman a ni bawk.

LUNGLEI

Lungleiah chuan Ṭhuamluaia Mualah R-Day hman a ni a, district bawrhsap Ramdinliani'n hnam puanzar a pawt pharh a, parade contigent-te'n hnam puanzar chibai an bûk a chháng lêt. Lungleiah hian parade contingent 24 awmin, armed contingent pali, unarmed contingent paruk, school contingent12 leh band party pahnih an ni a; unarmed contingent-ah Lunglei College NCC leh school contingent-ah 2nd MAP English School te pakhatna an ni.

Governor Silver Medal dawngtu SI Narendra Kr. Basnet leh Fire Service Medal for Meritorious Service 2023 dawngtu Fireman Lalnunpuia te hnenah medal hlan a ni a; R-Day puala intihsiak hrang hranga ti ṭhate lawmman hlan an nih bakah, faina lama inelna lawmman sem a ni. Best sanitation worker atan Vanlalvuana leh Lalhmangaihthangi te thlan a ni bawk.

SIAHA

Siaha District Playground-a R-Day lawmnaah district bawrhsap Lalhmunsanga Hnamte-in hnam puanzar a pawt pharh a; Vaihpi High School-in National Anthem an rem a, lawmman chi hrang hrang sem a ni.

R-Day lawmnaah hian parade contingent 15 awmin, uniform contingent panga leh school contingent 10 an ni a; uniform contingent zingah Mizoram Police leh school contingent zingah Hill Gate School pakhatna an ni. R-Day puala volleyball tournament-a champion-te hnenah lawmman hlan a ni a; khelmuala hun hman zawhah Circuit House-ah At Homebuatsaih a ni bawk.

CHAMPHAI

Champhaiah chuan Chhangphut Field-ah R-Day lawm a ni a, bawrhsap James Lalrinchanna'n hnam puanzar a pawt pharh a, parade contingent 18 - armed contingent pahnih, unarmed contingent pasarih leh school contingent pakuate'n hnam puanzar chibai an bûk a chháng lêt.

Parade-ah hian pakhatna aṭanga pathumnate hnenah lawmman hlan a ni a; school contingent-ah pakhatna chu GM Higher Secondary School Girls niin, unarmed contingent-ah Kanan Middle School Bharat Scout & Guide pakhatna an ni. Chhangphut Field-a hun hman zawhah Jericho Garden-ah sawm bikte pualin VIP's At Home buatsaih a ni bawk.

KOLASIB

R-Day hi Kolasib-ah chuan Kolasib Sports Stadium-ah lawm a ni a, DC John LT Sanga'n hnam puanzar a pawt pharh a, parade contingent 16-te'n hnam puanzar chibai an bûk a chháng lêt.

Parade-ah armed contingent pakhat, unarmed contingent pathum leh school contingent 12 an awm a; unarmed contingent-ah St John's HSS NCC Army Wing pakhatna niin, school contingent-ah DIET, Kolasib pakhatna an ni. Lawmpuina leh chawimawina chi hrang hrang hlan a ni a, Kolasib khawpuia faina lama intihsiaka che ṭhate hnenah lawmman hlan a ni bawk.

SERCHHIP

Serchhip Sports Complex-a R-Day lawmnaah bawrhsap David Lalthantluanga'n hnam puanzar a pawt pharh. Police leh Excise and Narcotics lama thawk ṭha thlante hnenah chawimawi hlan a ni.

Parade contingent 18 an awm a, armed contingent pakhat, unarmed contingent pariat leh school contingent pakua an ni. Unarmed contingent-ah Serchhip College NCC Army Wing pakhatna an ni a, school contingent-ah pakhatna chu Goodwill English Academy an ni.

LAWNGTLAI

Lawngtlaiah chuan CYLA Playground-ah R-Day lawm a ni a, bawrhsap Cheemala Siva Gopal Reddy-a'n hnam puanzar pawt pharhin, parade contingent 23-te'n hnam puanzar chibai an bûk a chháng lêt. Parade-ah hian school contingent aṭangin Jehova Jire Higher Secondary School, LAHAS leh ML Junior English School-ten lawmman an dawng.

Lawngtlaiah hian R-Day pualin Lawngtlai District Hospital Poor Fund, District Jail, Motherless Home leh Lairam Rescue Centre-ahte thilpek hlan a ni bawk.

MAMIT

Nimin chawhma dar 10-a Mamit GSA Playground-a R-Day lawmnaah bawrhsap VL Remliana'n hnam puanzar a pawt pharh a; 4th IR inspector F Manhleia, leh cons. R Laldawngliana te hnenah police hna thawk ṭha chawimawina Governor's Silver Medal a hlan.

Mamitah hian parade contingent 17 awmin, armed contingent pakhat, unarmed contingent pathum leh school contingent 13 an ni a; unarmed contingent-ah St. Francis of Assisi School NCC leh school contingent-ah Jawahar Navodaya Vidyalaya School-te pakhatna an ni. Khelmuala hun hman zawhah Buannel Home, Joshua Home, District Jail leh District Hospital-ahte DC-in R-Day pual thilpek a hlan bawk.

SAITUAL

Saitualah chuan zing dar 7-ah Saitual Keifang Centenary Ground-ah R-Day lawmna inkhawm ṭan a ni a, bawrhsap Dr Lalngura Tlau-in hnam puanzar a pawt pharh.

Saitualah hian parade contingent 14-in hnam puanzar chibai an bûk a, an zingah Keifang Presyterian English School pakhatna an ni. C Lalruatkima hnenah national award - Best Achiever Award hlan a ni.

KHAWZAWL

R-Day vawi 75-na hi Khawzawlah chuan Mualvawm Ground-ah lawm niin, bawrhsap K Lalrohlua'n hnam puanzar a pawt pharh. Millionaire Farmer Award dawngtu KB Sangkhuma, Rabung hnenah District Administration hmingin lawmpuina thilpek hlan a ni.

Parade-a ti ṭha te, Khawzawla veng leh sikul faite hnenah lawmman hlan a ni a; R-Day parade-ah hian St. Joseph’s School chu pakhatna an ni. Chhanchhuahna Home, District Hospital leh Grace Camping Center hnenah R-Day pualin ṭanpuina pek a ni a; khelmuala hun hman zawhah DC Banglaah sawm bikte tan At Home buatsaih a ni bawk.

HNAHTHIAL

Hnahthialah chuan R-Day hi HDFA Ground-ah lawm a ni a, bawrhsap Chuauhnuna'n hnam puanzar a pawt pharh a, parade contingent-te'n hnam puanzar chibai an bûk a chháng lêt.

Hnahthialah hian sikul pariat aṭangin parade contingent 10 an awm a, Hnahthial College NCC nen contingent 11 an ni a, Hnahthial Higher Secondary School (Girls) chu pakhatna an ni. Khelmuala hun hman zawhah sawm bikte pualin DC banglaah At Home buatsaih a ni bawk.

HMUN DANG

Republic Day hi nimin zing khan Chief Minister's Office tualah pawh hman niin, chief minister Lalduhoma'n hnam puanzar a pawt pharh.

Gauhati High Court, Aizawl Bench building tualah pawh zing dar 8 khan R-Day hman niin gauhati HC judge Justice Michael Zothankhuma'n hnam puanzar a pawt pharh a, CRPF-te'n hnam puanzar chibai an bûk a ni.

Kolkata Mizoram House, Salt Lake-ah pawh Republic Day vawi 75-na hman a ni a, Assembly speaker Lalbiakzama'n hmanpuiin, hnam puanzar a pawt pharh. He hunah hian Mizoram House-a thawkte leh Kolkata-a Mizo awm ṭhenkhatte an tel a ni.