Myanmar sipaite hruai haw an ni
Mizoram chhunga Myanmar sipai rawn tlânchhia, anmahni hruaitu tur thlawhtheihna Lengpui Airport-a a chêtsual vanga January 23, Thawhlehnia hruai haw theih tâk lohte chu nimin khan thlawhtheihna dang hmangin Myanmar lamah hawpui an ni.
Vanglaini thu dawn danin, nimina Myanmar sipai an hruai chhuahte hi mi 92 an ni a, an rual hian thlawhtheihna chesuala chuang mi 14-te pawh hruai haw nghal an ni a, an zinga mi pariat chu an hliam a ni.
Myanmar thlawhtheihna hi nimin khan ṭum hnih Lengpui Airport-ah a rawn ṭum a, ṭum khatah mi 53 ve ve a phur haw a ni.
Tun ṭuma Myanmar sipai Mizorama rawn tlanchhiate hi mi 277 niin, January 17, 2024-ah Lawngtlai district-a Bandukbanga khuaah an lut a, Assam Rifles-in an lo buaipui. An zinga mi mi 184 chu January 22, 2024 khan Lengpui Airport aṭangin Myanmar thlawhtheihna hmanga hruai haw an lo ni tawh.
November 2023 thla tìr lam khan Myanmar sipaite mipui sipaite'n an hneh avangin Mizoramah an tlanchhe ṭan a; ṭum ruk rawn tlânchhe tawhin, chu'ngte chu sipai 637 an ni.