Aizawl FC-in Goa-ah point 1 hmu

Goa-ah Aizawl FC-in Alfred Kemah Jaryan goal hmanga point khat hlu tak an hlawh chhuak a, table mawngphah an chhuahsan.

Nimin tlaia Goa-a Fatorda Stadium-a inkhelah Aizawl FC-in Liberian striker Alfred hmangin minute 28-na lekah hma an hruai a, amaherawhchu ṭum dang ang bawkin MPL champion-in an goal thun an venghim zo lo. Sporting Goa-in minute 36-naah captain Mahmoud Al Amnah hmangin an sut a, goal dang a luh belh lo.

Point 13 hmu zingah Aizawl FC an dinhmun a la ṭha hret a, hei hi point 13 hmute inkhelh kualna bika an result
ṭhat vang a ni a; nimahsela Salgaocar hian game khatin an khel tlem a, nizana inkhel DSK Shivajiyan hian nizan tiam loin game 12 chiah an la khel bawk.

Striker thar?

March 15 kha foreigner lakluhna hun tawp a ni chungin Sporting Goa-in inhliam midfielder Densil Theobald thlak nan Nigerian striker Efemena Charles chu Aizawl FC hmachhawn turin an chhawp chhuak.

Flaming Oranje (Sporting Goa kohna) chuan hun tiam chhungin Nigerian striker hi an ziak lut hman a, fitness ṭhat tawk loh vang chauhin an chhawr tlai niin an sawi thung. Sporting Goa hian Aizawl FC an hmachhawn hmaa an match hnuhnung ber chu March 13 khan DSK nen an khel a, 1-3 in an chak lo.

Nigerian striker Efemana hian khup hliam Odafa Okalie a thlak a, tlar hmaah a mal tlat. Aizawl FC-in Shillong Lajong hneh lo team aṭangin player pakhat chiah an thlak a, Ricky Lallawmawma aiah Lalṭhakima luhtir a ni.

Point 1 a hlu

Sporting Goa-in bul ṭan ṭha mah se Aizawl FC-in counter attack aṭangin an ti-goal. Joel Sunday-a cross chu Alfred-a'n goal-ah a chantir a, Liberian striker hi DSK laka goal a khung hnua a thun lehna hmasa ber a ni.

Inkhela chungnung zawk Sporting Goa-in minute 36-naah an sut a, captain Al Amnah thawhrah niin Marcus Masca-renhas nen an in wall pass mawi hle.

Second half-ah Aizawl FC-in goal venhim an ngai pawimawh a, Brandon aiah F. Lalrinpuia an dah lut a, tlarhnung tichak turin Joel Sunday aiah Nigerian defender Emma an luhtir bawk.

Goa khawlum hnuaiah Aizawl FC an ṭang tluan a, point khat hlu tak an hlawhchuah zarah I League khelh zel beiseina an tinung thar.

Aizawl FC tana inkhel pawimawh chu Thawhṭannia Salgaocar an mikhual tur hi a ni. MPL champion leh Salgaocar hi Goa-ah 1-1 in an inhnehtawk a, hnehna an chang a nih chuan Aizawl FC tan I League khelh zel a beiseiawm ang.

Aizawl FC coach Jahar Das chuan, "Football-ah chuan goal khung hmasak hnua insuttir hi thil theih a ni. Kan tan chuan Goa-a point khat hlawh chhuah hi a hlu a, result hi a lungawithlakah kan ngai," tiin inkhelh banah Vanglaini a hrilh.

Nomawi chuh inumna

Thawhlehni zanah Mohun Bagan-in Jeje Lalpekhlua leh Yusa Katsumi hmangin ṭum hnih zet hma hruai mah se Uilliams hmangin Shillong Lajong-in an sut ve ve a, 2-2 in an hnehtawk. Goal hnih khungtu Brazilian striker chu hero of the match-ah thlan a ni.

Jeje-a'n Kolkata Derby-ah penalty hlah mah se goal nen a tho chhuak. Hnahthial tlangval chuan, "Chak turah ka inngai hman a, kan vanduai a ni. Striker tan chuan goal khung hi kan hna a ni a, penalty hlah vang khan ka hnual phah lo," tiin Vanglaini palai a hrilh.

East Bengal-in an hun ṭha neih an hmang ṭangkai lo a, Bharasat Stadium-ah Mumbai FC nen 2-2 in an inhnehtawk. Mikhual team tan Steven Dias (15’) leh Ashutosh Mehta (77’) ten goal an khung a, Red and Gold Brigade tan Ranti Martins (25’) leh Bernard Mendy (59’) te'n an khung ve bawk.

Nizan khan Bengaluru FC leh DSK Shivajians an inkhel a, result kan hre hman lo. A zawnin match hnih Mariners an chetsual avangin champion turin Blues dinhmun a ṭha ta hle.