Mi ang lo tura duan

A khuhhawnna: Lalzuahliana a awm. Chu pa chu Zofate zinga poet danglam leh a kutchhuak (poem) phei chu a sakechek nazawng tana han nel a, han tuipui phak chi rual loh tur khawpa thuk leh tak ngen ngawn tak mai hi a ni hlawm a. Titi thukhawchang a han sep vel nikhua hian "Mi ang lo vek kan ni. Mi an tum duh suh" tih ang duangte hi a sawi fuk fuk fo a. Hnial rual a ni lo. Khawvelah hian mi tam tak an lo piang tawh a, an piang zel bawk ang a. Chu'ng zingah chuan keimahni 'ang' an awm ngai lo ang.

Mi an tuma kan beih hah nasatzia hi i chhut ve ngai em? Mi an tuma kan hun, tha leh sum kan sen zozai hi chhut ta hlawm ṭheuh i la; mi ang ve ta anga kan inngaih rual chiah hian mi kan an lohzia hi kan chhutchhuak thei mai lo'm maw chu?

Inkhawmna leh khawhar-inah 'mi an' tumin kan tei chhuak ve a ni maithei a, thawmhnaw leh zirna, eizawnna leh infiamna lamah 'mi ang' ni ve taah kan inngai a ni maithei. Mahse a pawnlawi mai a ni! Keimahni taktaka hi chu mi ang lo tura duan leh hrin, vana arsi ang maia Khuarel thil tikalhkim tura a hranpa ngata siam kan ni. Danglam bik taka siam, mahni puala nihna leh hming pawh nei hran ngat kan ni asin! Kan hming ang chu mi dang paw'n an lo pu ve nawlh nawlh a ni maithei; mahse hming piah lama mihring chu inṭawm theih thil a ni ve hlek si lo.

Obama pakhat chauh an awm lo vang: Lalthanhawla pawh pakhat chauh an awm lo vang. Hming in-angte danglamna siamtu chu mihring a ni. Mi ‘an’ tumin kan bei chiam chiam a, mi ropui leh kan mi ngaihsan te an tum phei chuan kan bei nasa lehzual. Mahse engtikah mah kan ang ngai lo vang. Chu'ng mite chu TV leh chanchinbu-ah te kan hmu fo a, kan hmingpuite pawh an ni thei - mahse mi dang an ni.

He leilungah hian mahni ṭheuh hi 'mi dang' ni lovin 'keimahni' kan ni tlat a. Keimahni chauh hian 'keimahni' a siam thei a, mi an tumin bei chiam mah i la, kan kir lehna chu keimahni tho tho a ni.

Keimahni aṭangin kan ir^wm thu leh hla leh thiltih a chhuak a; mittui leh hlimna pawh keimahni aṭang chauha chhuak a ni. Chuti angin hlim ni leh lungngaih ni-ah pawh kan thinlung chu keimahni ta pual bik chauh a ni. Mi dang 'ang' nih tumin kan tlan chiam a, engtik khawtikah mah mi kan ang dawn chuang lo. 'Mahni' ni mai i la, kan hlutna leh kan nihna kan hriatchian poh leh, kan chhungril aṭangin chakna kan sawr chhuak tam dawn hi a lo ni a. Kan nih dan leh sukthlek dana hi mi ang nih tuma beih chiam ai chuan a lo pawimawh zawk fe mai.

Nia, kan nuna thil thleng hrang hrangte hi han ngaihtuah i la, kan tel lo chuan a thleng thei lo! Kan theihna, thiamna, hmelhmang, ṭhian leh hmelhriat, phurrit, lungngaihna leh thil dang dang pawh hi keimahni ang chiaha tawng leh nei hi tumah an awm thei lo.

Lu hi ziat kawlh ṭhupin, sam hi zuah buk ṭhup pawh ni ila, in-ang a awm thei dawn chuang lo! Punkhawmna hmunah rual takin kut bengho ṭhup ṭhup pawh ni i la, 'mi hran' vek kan ni - mi in-ang lo vek!

Ka nuihpui ṭhin thilte hi mi tlemt> chauhin an nuihpui ve a; mahse keimaha a thawhdan angin a thawk ve chuang hlek lo vang. Thinlung aṭanga ka ṭawngṭaina ang rilru chu tuma'n an pu ve thei lo va, mi ka hmangaih angin tuma'n an hmangaih ve thei hek lo.

Nang anga mi danglam hi i pian hma khan an la piang ngai lo va, i thih hunah pawh an rawn piang chuang hek lo vang. Kan danglam bikna hi pawm tawp mai i la, mi an kher tum lovin, mi dang ang ve tura din kan ni lo tih hi hriatthiam tum mai i la, mi an tum reng renga kan buaina za t>l hi thawklehkhatah a bo duak ang a, kan hriat loha kan insiamchawp phurrit hrang hrang hi chu hnara hlit phawi ang huaiin a kiam nghal duak tur a!

Mi dang lakaha kan danglam miau a, khawvelah hian kan ngaihtuahna, rilru leh thlarau milpui chiah chiah an awm ngai dawn lo. Lo piang lo ta i la, leilung hi mi pakhatin an kim lo dawn tihna a ni! Khawvel chanchinah ruak pakhat a awm dawn tihna a ni! Chuvangin, kan tel ve hian khawvel hi a tifamkim a, a bik liau liaua duan kan nihna, mi ang lo tura a hranpa ngata siam kan nihna hi chhuang taka chhawmchhuak tur chu kan ni e! Tu nge, mahni nihna (identity) zawng zawng nena mi dang nihna thleng phal ang ni? Heti mai pawh hian kan hlu a, kan mawi a ni!

Mite tana kan tihsak theih ang hi mi dangin an thei ve lo va, kan awk^ chu tuma'n an sawichhuak thei lo. Kan rilru chu tuma'n an siam thei lo va, kan lungawina chu tu min pek mah a ni lo. Mi dang hriatthiamna chu tuma'n min siamsak lo va, kan thinlung lawmzawngte chu tuma'n min ṭawmpui thei lo. Min ṭahsak thei leh min nuihsak thei an awm lo va, Siamtu tih lohah chuan engkim bul leh tawp chu keimahni kan ni.

Keimahnia ze danglam tak awm hi mi dangin min chanpui thei lo bawk a, kan danglam bikna chu he leilungah hian kan pholang ve mawlh mawlh mai tur alawm!

Chutichuan, kan suangtuah leh thiltih lai mek chu mite'na an lo tih ṭhin tawh nia ngaiin, kan hnual phah bik lovang a, mi zawh tawh kawng zawhtu satliah ve mai chauhah kan inngai bik lovang a, keimahni chauh lo chuan he kawng hi kan zawh thei lo tih hriatchianna zawka hi kan dinpui tura chu a lo ni - mi ang lo kan ni si a.