Cyclone-in Meghalaya nuai

Meghalaya state chu Thawhlehni khan Cyclone-in a nuai a, mi pasarihin hliam an tuar a, hliam zingah hian hmeichhia pahnih an tel.

Thli na taka tlehin ruah a sur bawk a, ruah sur a tam avang leh ṭek tla a nasat avangin thing tlu, telephone leh electric ban chhia a tam hle. East Khasi Hills district-a Nongmynsong, Umpling, Pynthorbah leh Nongpathaw te chu a nat zualna a ni. East Khasi Hills District Magistrate Peter S. Dkhar chuan, "Cyclone hian in leh lo tih chhiat a nei nual a, hmun tam takah chuan inbiak pawhna thlengin a nghawng a, harsatna tawk te tan hian hmalak nghal thuai a ni" a ti.

Thli leh hian in 150 vel a len chhia a, school leh Biak In chhia a awm nual bawk.

East Khasi Hills District Deputy Commissioner P S Dkhar chuan, Pynthor-Demseiniong huam chhungah chhungkaw 87 te chuan thlipuiin an in a lenchhiat avangin harsatna an tawk a, school building chhia a awm nual bakah thing tluin electric hrui a vaw chhe nual bawk niin a sawi.

Umpling-ah chuan chhungkaw 51 te chuan harsatna an tawk a, mi pathum chuan hliam tenau an tuar. Nongpathaw-ah pawh chhungkaw 13 chenna in chu Cyclone a nuai chhia.. Chhiat tawk te hi tanpui vat an ni a, blanket te pek an ni. Block Development Officer chuab DC hnenah harsatna an tawh hi a thleng tawh a ni.

Hetih lai hian department hrang hrang PWD, MeECL, Civil Defence, Home, Guards, Forest leh Fire and emergency service te chu a ṭul huna che chhuak mai thei tura hriattir an ni. Guwahati-a Regional meteorological centre chuan Cyclone chak zawng hi darkar khata km 60-a chakin a tleh tih a sawi a, Assam leh Meghalaya te chu a nuai niin an tarlang.