Sunday School Day vawi 44-na hmang

Nimin Pathianni, January 21 kha United Pentecostal Church (North East India) Sunday School Day vawi 44-na a ni a, tualchhung kohhran hrang hrangin an remchan angin an hmang. General Sunday School department-in thupui an thlan chu 'Kan fate i chhanhim ang u' tih a ni.

General Sunday School director Rev. Biaksangzuala'n Sunday School Day thuchhah a tichhuak a; "Kan eizawnna atana rim taka kan thawk chungin kohhran mipuite'n Pathian thu an zirna, sunday school zirtirna atana in hun leh thâ in sènte a ropui tak zet. Hetih mek lai hian, zirtirtu ruat kawngah kohhran committee leh rorelna sang zawkte pawh kan fimkhur lehzual a ṭul a, zirtirtu ni mekte pawhin kan mawhphurhna pawi­mawhzia hre chunga inbuatsaihna ṭha tak nen kan rawngbawlna hlen turin theihtawp i chhuah thar ang u," a ti.