Sangha dil siam theihna la hman ṭangkai loh ram h.a. 24,000 a awm

Fisheries department chuan nimin khan Fisheries minister Lalthansanga hoin an directorate conference hall-ah kum thar atan infuih tharna inkhawm an buatsaih. He hunah hian Mizoramah sangha dil siam theihna ram hectare 24,000-a zau la hman ṭangkai loh a awm thu tarlan a ni.

Minister Lalthansanga chuan, sorkar chu mipui awlsamna leh ṭhat tlàn zawkna tura ding a nih thu a sawi a; Fisheries department-a thawkte chu dikna, rinawmna leh inpekna nen ṭhahnemngai taka hna thawk ṭheuh tur leh ram damlo tidamtu ni turin a sáwm.

Fisheries director F Vanlallawma chuan, Mizoramah sangha dil nei mi 18,519 an awm mek a, sangha thar chhuah chu kum khatah metric ton 5,029 a nih thu leh, Mizoramah sangha dil siam theihna ram, tuna la hman ṭangkai loh hectare 24,000-a zau a la awm thu a sawi.

F Vanlallawma sawi danin, Fisheries department hi kum 1993-ah Agriculture department aṭangin a indang a, district 11-ah an inbun tawh. Thawktu indaih lohna avangin duhthusamin hna an thawk thei lo ṭhin a ni.