Aizawla vawk khuahkhirh dan tur sawiho
Aizawl Municipal Corporation (AMC) chuan nimin khan an auditorium-ah local council hruaitute pualin Aizawla vawk vulh inkhuahkhirhna kalpui dan tur sawihona an buatsaih. Aizawl Mayor chuan, mipui tana ṭha turah chuan an tih tur an ṭhulh dawn loh thu a sawi.
Mayor Lalrinenga Sailo chuan, Aizawla vawk vulh khuahkhirhna an kalpui tur chu khawpui a thianghlim a, mipuiin vawk hrisel ei tur an neih theihna tura ruahman a nih thu a sawi a, "Thil ṭha tih dawn leh kalphung thlâk dawn hian harsatna tam tak a awm ṭhin. Mipui tana ṭha turah chuan AMC hian politics emaw, mimal emaw hamṭhatna tur a nih dawn vang ringawtin kan tih tur kan ṭhulh phah dawn lo," a ti a; khawpui leh mipui tana ṭha turah chuan an tih tur ṭhulh lo turin LC-te a chah.
Veng dangin an tih theih chu tih theih ve tum tura LC hruaitute chahin Mayor chuan, "Eizawn nan vawk vulh hi mi tam takin an hmang a, tihtawp kan tum lo. Awmze nei zawka inkaihhruaina dan kan kalpui dawn mai a ni. Municipality danah ui, ar leh ran dang thlengin khuahkhirhna a awm vek a, vawk hi a langsar a nih avangin bulṭan nan kan hmang a ni," a ti.
Lalrinenga Sailo chuan, vawk vulh ngaihhnathiamna chu kum tluana vawk vulh theihna tur a nih loh thu leh khuahkhirhna huam chhunga vawk vulh laklawhte hriatthiam rihna tur chauh a nih thu a sawi bawk.
Tarlan danin, vawk vulh ngaihhnathiamna (exemption) hi January 2024 chhungin dil theih a ni a, diltute chu vawk an vulh lai leh vulhna hmunte February 2024 chhunga AMC leh LC aiawhte'n an endik hnuah phalna pek tlâka an ngaihte hnenah permit pek a ni dawn.
Vawk vulh laklawhte chu vawk len dan azirin tihral/talh hun tur chhût a ni ang a, chumi hmang chuan permit pek a, permit dam hun chhung chhût tur a ni. Permit dam chhung bak chu khuahkhirhna huam chhungah vawk vulh phal a ni dawn lo.
AMC huam chhungah mi dang tana hlauhawm leh hnawksak zawnga vawk vulhte chu Municipality Act Section 175 angin Rs 2,000 thleng chawitir theih a ni a, an zawm loh zel chuan ni tin Rs 200 chawi belhtir zel theih a ni. Section 178 hmangin ran in nei mumal lote chu Rs 2,000 thleng pawisa chawitir theih a ni a, an siamṭhat loh chuan ni tin Rs 200 chawi belhtir theih a ni. AMC Solid Waste Management By-Law, 2019 hmangin vantlang hmuna thenfai loha ran êk a awm chuan Rs 5,000 thleng chawitir theih a ni bawk.
AIZAWLA VAWK KHUAHKHIRHNA
▶ Vawk vulh duhte'n chenna-in hnai ber aṭanga ft. 100 aia hnaiah vulh phal a ni lo.
▶ Mi dang tana hnawk leh rimchhia te, leimin leh harsatna dangte thlen thei turin vawk vulh phal a ni tawh dawn lo.
▶ LC leh chenna-in hnai berte nena endikin, harsatna siam lo tura ngaih a nih chuan ngaihhnathiam theih a ni.
▶ Ngaihhnathiamna dil duh chuan LC kaltlangin AMC-ah dil tur.
▶ AMC chhunga vawk vulh reng reng fel taka chhinchhiah tur a ni.
▶ Vawk chhinchhiah lohte chu Mizoram Municipalities Act, 2007 angin a neitute hrem theih a ni.
▶ Kawngpui leh lui hnaih lutukah vawk-in sak loh tur a ni.
▶ Vawk vulhna hmunte chu AMC leh LC-te'n an endik ṭhin ang.
▶ Vawk-in ṭha taka sak tur a ni a, hmun him leh min hlauhawmah sak loh tur.
▶ Vawk-in chu ft. 6 tala sang, boruak thengthaw ṭha taka sak tur a ni.
▶ Vawk thlîte leia luang ral leh inchiah ral mai lo turin, tuichhe paihna ṭha taka siamin tui luankawr hnai ber zawmtir tur.