SC-in Kejriwal-a chungthu ngaihtuah tur a stay

Supreme Court chuan Delhi chief minister, Arvind Kejriwal leh Aam Admi Party (AAP) hruaitu, Sanjay Singh te laka prime minister Narendra Modi zirna chungchang an sawi avanga intihhmingchhiatna thubuai thehluh ngaihtuah hun tur chu stay a nih thu a tarlang.

Thubuai hi Justice BR. Gavai ṭhut Supreme Court bench-in ngaihtuahin kar li chhung stay a nih thu an tarlang a, hei hi Kejriwal leh Sanjay Singh-te'n thubuai theh luh a nihna, Gujarat High court-a an laka thubuai theh luh hnuhdawh an dilna ngaihtuahna hun atana pek niin SC chuan an tarlang. AAP hruaitute laka thubuai theh luttu hi Gujarat University Registrar, Piyush Patel a ni.

Sanjay Singh hian SC-ah hian petition theh lutin, an chungthu chu Gujarat pawn lama ngaihtuah a nih theih nan a dil a, Singh-a dilna erawh SC hian a hnawlsak thung a ni. An laka intihmingchhiat thubuai theh luh hi Kejriwal leh Sanjay Singh hian stay a nih theih nan Gujarat High court-ah an lo thlen tawh bawk a, hei pawh court hian a lo hnawlsak tawh bawk.