Chief secretary Lalnunmawia Chuaungo chuan, India Prime Minister-in March 24, Thawhlehni zana India ram pumah ni 21 chhung inkharkhipna (lockdown) kalpui a nih tur thu a puan leh kalpui ṭan nghal chuan Mizoram kal mek dan a tihdanglam vak loh thu a sawi a; thingtlang lam mi, an loa feh turte chu indang lo turin village task force-te a chah.

Nimina Health Minister-in press conference a neihnaah Chief Secretary chuan, Mizoramah chuan March 22, Pathianni aṭangin lockdown kalpui ṭan a nih tawh thu sawiin, "PM-in lockdown a puan tharah hian tih belh em em tur a awm lo. Mipui tan tuna kan tih bak belh tur a awm chuang lo a, sorkar tan erawh thil ṭhenkhat a awm," a ti.

Chief Secretary chuan, "Thingtlanga loneitute an loah an feh tur chu thil pawi a ni lo, a hlauhawm loh. Feh hi chu inphalsak tur a ni. Feh tura chhuaka silai ken chhuah erawh phal a ni lo," a ti a; lockdown tih chhan ber chu mi awm khawm loh a nih thu a sawi.

Mizoram páwna zin mek tangkhangte chu Mizorama rawn let rih lo tura tih an nih thu sawiin, Lalnunmawia Chuaungo chuan, "Mizoram House hrang hrangah an tlukluhna tur ruahman a ni. He hmalakna hi zin mekte harsatna siam tum vang a ni lo a, kan ram leh mipui himna tur a ni," a ti.

Chief Secretary chuan zawhna chhangin, Mizoram páwn aṭanga rawn lutte quarantine vek tur tih hnuah Mizo leh vai thliar loin qua­rantine vek an nih thu a sawi bawk.

Chief Secretary sawite

•India ram lockdown hi Mizorama lock­down kan kalpui mek ang hi a ni.

•Thingtlanga mahni loa feh turte chu lo fehtir rawh u.

•Feh tura silai ken chhuah tel phal a ni lo.

•Mizoram páwna tangkhang mek tan Mizoram House-ah hmun ruahman a ni.

•Quarantine tih hnuah Mizo leh vai thliar loin quarantine vek an ni.

Share this Post