MJA-in kum thar pualin thingpui an inho

Mizoram Journalists Association (MJA) General Headquarters chuan nimin khan Aizawl Press Club-ah kum thar pualin thingpui inho an buatsaih a, MJA member ṭhahnem tak an tel.

MJA thingpui inhonaa thusawitu MJA president C Lalrambuatsaiha chuan, MJA member-te chu ṭan la thar turin a fuih a, "Thil tihnaah a hun taka thlen leh thil tih kan zir a ngai a, a huna thlen hi tih dan phungah kan neih a ngai. Hun dik taka hman i zir ang u," a ti.

C Lalrambuatsaiha chuan, chawhmeh bai thiam takte chu an uluk vanga bai tui thiam an nih ṭhin thu sawiin, "Keini ho hian kan chaw bêl hi kan vil uluk tawk lo deuh em? Kan eizawnna hi kan vil uluk deuh a ngai em? Kan taimak leh zual a ngaiin a lang. Kan thiamna tihmasawn turin ṭan i la lehzual ang u," a ti a, thuthar leh chanchin ziah chu an chaw bél, an eizawnna a nih avangin uluk lehzual turin a chah.

Inkhawm hi MJA vice president Lalremsiama'n a kaihruai a, general secretary Lalrinmawia Sailo-in kum 2023-a MJA hmalakna tlangpui a sawi. MJA member-te'n an ngaimawh zawngte an sawi bawk.