NIT Convocation MZP-in dodal an tum

MZP Gen.Hqrs hruaitute nimina ṭhukhawm chuan, National Institute of Technology (NIT), Mizoramin thawktu a lak dan a dik tawk loa an ngaih avangin, hna lakna chu an sût loh chuan January 17, 2024 (Nilaini)-a convocation an hman tur chu dodal an rêl.

MZP tarlan danin, NIT, Mizoram-in assistant registrar a lak danah induhsakna uchuak leh thil felfai lo tam tak a awm nia an hriat avangin MZP chuan a rang thei ang bera hna lakna chu sût turin NIT an phût a ni.

MZP chuan, Mizo zirlaite leh lehkha thiam ṭhalai hna zawng mekte inkarah inelna thianghlim a awm zel theih nan NIT, Mizorama hna lak dan fel lo tak chu sût a nih loh chuan January 17, 2024-a NIT, Mizoram convocation neih tur chu an dodal dawn thu an puang a; hna lak chu sût a nih theih nan sorkar laipuia Ministry of Education-ah lehkha thawn an rel bawk.