Roma ngamtu Giroud awmna Milan

AC Milan striker Olivier Giroud chuan team innghahna tlak a la nihzia a lantir nawn. Pathianni zan Serie A inkhelah Giroud hian goal a khung bakah a ṭhiante khung tur siamsak bawkin a team chu AS Roma lakah 3-1 in a chakpui.

Kum 37 mi Giroud-a'n awmna tur hmun a thlan fuh avangin an goal hnihna a tauh lut, inkhel tir lamah Milan tan Yacine Adli chuan amah vengtu a bum hnuah tawih zetin goal a lo khung tawh bawk.

San Siro-ah hrem vangin Jose Mourinho-a'n a naute a ho thei lo a, an boruak a sang tawk lo deuh. Mikhual lam hian Leandro Paredes-a penalty chhuih luh hmangin beisei nei ve leh mah se, striker Giroud siamsak khungtu Theo Hernandez-a'n Roma beiseina a hmet mit.

Hnehna changtu AC Milan hian league match 20 aṭanga point 42 hmuin pahnihna an ni a, champion an la beisei ngam. Milan coach Stefano Pioli chuan, "2-1 a nih kha chuan engkim a la danglam thei a, inlehthal thei reng pawh kan la ni.

"Roma khan an hnung lam an rem thiam em em a, sut tlang pawh an harsa hle. Mahse, kan hna ṭha takin kan thawk thei," a ti. Coppa Italia aṭanga an tlak avangin sawisel an hlawh a, coach Pioli hi ban mai theih angin thawm a ri hman, tunah erawh boruak ṭha an nei dawn niin a lang.

AS Roma striker Andrea Belotti chuan, "Tuna kan awmna hi Roma nihna nen a inmil lo, a rang thei ang bera thawhchhuah a ngai," a ti. Roma hian point 29 chauh an la neih avangin pakuanaah an awm.