Covid-19 léng chungchangah MKHC-in Rampum huap ṭawngṭai a huaihawt dawn

Mizorama kohhran pawl hrang hrangte intèl khawmna Mizoram Kohhran Hruaitute Committee (MKHC) chuan nimin khan thuchah an tichhuak a; ram hrang hranga Coronavirus (Covid-19) léng mek chungchangah March 28, Inrinni zan dar 7-ah Mizoram pum huapin ṭawngṭai rual huaihawt a ni dawn tih an puang.

MKHC chuan, Covid-19 hripui leng laka Mizoram mipui him theihna tura theihtawpa hma latu Mizoram sorkar, mawhphurtu hrang hrangte leh sorkar hmalakna ṭha taka zâwmtu mipui chungah lawmthu an sawi a, "Covid-19 leng chungchangah hian ram pum huap ṭawngṭai rualna March 28, Inrinni zan dar 7-ah nei turin ruahman a ni a, chhung tinte'n lo zawm ṭheuh turin kan ngen a ni. Tuna kan hun ruat bakah hian mahni remchan angin March 31 thleng chhung tinte zan tin ṭawngṭai thei ila a lawmawm hle ang," an ti. 

 ṬawngṬai thupui turte

1.Covid-19 laka Mizoram a him zel theih nan leh khawvelah chhiatna a thlen zel loh nan.

2.Mipui himna ngaihtuahtu ram hruaitute leh sorkara mawhphurtute tan.

3.Task force, NGO hrang hrang leh police-te tan.

4.Ramri, airport leh checkgate hrang hranga duty-te tan.

5.Doctor, nurse leh staff-te tan.

6.Mipui mamawh ngaihtuahtu FCSCA department-a mawhphurtute tan.

7.Dinhmun harsa zawk leh chhuanchham hlauhawma awmte tan.

8.Ṭanpui ngaite ṭanpui kawnga mi hausate an pên chhuah zel theih nan.

9.Mipuiin thu an âwih theih nan.

10.Khawvel hmun hranga Mizo hnahthlak awmte leh tangkhang mekte tan.

11.Chanchin ṭha thil tih theihna khawvelin a hriat theih nan.

12.Kan hun tawn mek hi kohhrante'n thlarau lam malsawmna an dawnna remchang a nih theih nan.



Share this Post

Login to comment
No Comments