Mbappe hoin PSG kang sang

Kylian Mbappe-a'n tun season Ligue 1 goal 19 a khung zanah Paris Saint Germain chuan Lens 2-0 in an hneh a, point 43 hmuin anmahni hnaih bertu Nice lakah point riat ngawtin hma an hruai fal ta.

Pathianni zan Ligue 1 inkhelah Luis Enrique enkawl PSG hi rinkai zawk an ni a, mikhual team hian minute 30-naah Bradley Barcola hmangin hma an hruai, a siamsaktu chu Mbappe a ni.

Goal luh hma hian Lens forward Przemyslaw Frankowski chuan penalty hlahin an hmahruai theihna remchang a bawhpelh a, chawlhlawk hma chiahin an defender Jonathan Gradit chu hnawhchhuah niin an dinhmun a ṭha lo zual.

Mahse, rin ai takin Lens an inveng zui thei a, goal an chhuah belh dawn lo ni pawhin a lang hman. Amaherawhchu, minute 89-naah France captain Mbappe chuan chak a nemnghet leh ta hram a ni.