Shillong Lajong lakah Highlander an chak

Indian Super Cup inkhelah nimin khan NorthEast derby kan hmu a, NorthEast United chuan 2-1 in Shillong Lajong an hneh - match hnih an khelha vawi khat an chakna a ni a, semifinal beiseina an chhi nung thar.

Shillong Lajong hian Douglas Rosa Tardin hmangin goal hmahruai an khung a, mahse, Highlander hian Spanish striker Néstor Albiach goal hnih hmangin an chhanglet a, 2-1 in hnehna an chang.

Pathianni zan inkhelah East Bengal-in 2-1 in Sreenidi Deccan an hneh a, Kolkata club tan Hijazi Maher leh Javier Siverio ten goal khat ve ve an khung a, Sreenidi tana William Alves goal khungin awmzia a nei phak lo.

I League club Sreenidi tan hian R. Lalbiakliana, Lalnuntluanga Bawitlung leh R. Lawmnasangzuala te bench aṭangin an lut a, mahse, an beisei ang result an hlawh chhuak thei ta chuang lo a ni - East Bengal erawh match hnih an khelhah an la chak ve ve.

Nizan khan Kerala Blasters leh Jamshedpur inkhelin, result kan hre hman lo a, vawiinah inkhel pahnih a awm ang - Chennaiyin leh Gokulam Kerala chu chawhnu dar 2:00-ah an intawng ang a, zan dar 7:30-ah Mumbai City leh Punjab FC an inkhel bawk ang.