Zuangtui Supply kudamah medical duty dah turin Chief Minister an ngen

Zuangtuia Supply kudamah buhfai phur truck tam tak, hnam dangin an enkawl state páwn aṭanga an luh reng avangin Muanna Veng Local Task Force (LTF) chuan Chief Minister hnenah lehkha an thehlut a, mipui himna atan Supply kudamah medical duty awm se an duh thu an thlen.

Muanna Veng LTF hruaitute chuan, Zuangtuia Supply kudam chu khâr mai emaw an duh hial thu sawiin, "Truck-te hi Mizoram an lo luh dawnin checkgate-ah endik an nih leh nih loh kan hre lo a, endik pawh ni se, a natna a lan chhuah har avangin kudamah hian medical duty-te'n check leh thei se kan duh," an ti a, sorkarin hma la vat se an duh thu an sawi.

Muanna Veng LTF vice chairman leh YMA president C Vanlalpianglawma chuan, buhfai phurtu vaite chu an duh anga an thunun ngawt theih a ni lo tih sawiin, "Kudama an luh hun nghakin a chhehvelah truck an ding ṭhin a, an tladah ang reng si a, chuvangin, ni khata unload zawh tâwk lek turin a chawp tê têin lo lut se, zan riak loin haw leh thei se kan duh ber," a ti.

Muanna Veng LTF hian Zuangtuia Supply kudam gate bulah kut silna an chhawp a, buhfai phur truck khalhtu leh handyman-te chu kudama an luh leh chhuah dawn apianga kut sil turin an hriattir a ni.



Share this Post

Login to comment
No Comments