Egypt leh Nigeria chak zo lo

Africa Cup of Nations 2024 khelh laiah, player langsar pahnih Mohamed Salah leh Victor Osimhen ten goal an khung ve ve a, mahse an ram Egypt leh Nigeria chakpui nan a tawk zo lo - point khatah an lungawi a ngai.

Pathianni zan group match inkhelah Salah chuan hun tawp hma chiahin penalty a khung a, an khingpui Mozambique nen 2-2 in an inhnehtawk. Osimhen awmna Nigeria pawh Equatorial Guinea nen 1-1 a inhnehtawkin point khat an hmu.

Minute hnihna lekah Salah siamsak hmangin Mostafa Mohamed chuan goal hmahruai khungin Egypt boruak a fuh. Mahse, second half tir lamah Mozambique lamin Witi hmanga an sut bakah Clesio Bauque hmangin hma an hruai.

Beisei phak baka khel ṭha Mozambique lamin a vawi khat nan AFCON-ah hnehna an chang dawn emawni an ti hman, mahse Domingos Macandza chuan Mohamed lakah penalty a chawi - Video Assistant Referee hmangin referee Dahane Beida chuan penalty hi a pe.

A pet tura rawn ding chhuak Liverpool forward Salah-a'n a khung a, an match hmasa bera an mualpho tur chu a rawn hliah khuh hram. Egypt hian an match pahnihna atan January 18, Ningani zanah Ghana an hmachhawn leh ang.

Inkhel dangah Equatorial Guinea tana Iban Salvador goal khung chu minute hnih hnuah Nigeria lamin an sut nghal, striker ṭha Osimhen-a'n si phurh sut mah se chakna goal erawh a pai tel rih bik lo.

Group A inkhel dangah a thlengtu Ivory Coast chuan Guinea-Bissau 2-0 in an lo hneh tawh a, point thum neiin hma an hruai. An inkhelh kual vek hnuah a sang pahnihten knockout round an lut nghal dawn a ni.