Wolves mikhual tur Brentford

Gtech Community Stadium-ah Wolves-in player 10-a khel chungin Brentford an chelh a, FA Cup third round replay an sual chhuak. Zanin dar 1:00 hian Molineux Stadium-ah Wolves hian Bees hi an mikhual thung dawn a, heta chak zawk hian fourth round-ah Championship club West Brom an hmachhawn ang.

Wolves hian replay an khelh avangin thlasik chawlh an nei ve dawn lo tiin a sawi theih a, kar liam ta khan awl mah se January 22, Thawhṭanni zan hian Premier League-ah Brighton an hmachhawn lehnghal dawn. Intawn hmasak ṭuma hnawhchhuah midfielder Joao Gomes a khel thei dawn lo a, manager Gary O'Neil tan Brazilian midfielder hi channa lian tak ni mah se tun ṭumah erawh player kimin a khel thei tawh dawn.

Brentford pawhin Wolves ang thoin thlasik chawlh an nei meuh lo a, hrem vangin Ben Mee leh Ivan Toney te an chhawr thei dawn lo. Toney hi pawisa thapnaa inhnamhnawih avangin thla riat chhung an hrem a, an hremna hi Wolves an hmachhawn zawh ni khatah a tawp dawn. Bees hian Wolves an tlawh ṭum match hnuhnung parukah vawi li ngawt an chak lo a, vawi hnih dang an chak. Zaninah chak tur zawk rin thiam a har hle.

Premier League club Luton Town-in Bolton Wanderers an tlawh dawn a, an mual Kenilworth Road-ah goal an khung tawh loh avangin Toughsheet Community Stadium-ah goal khung ngei an tum tawh dawn a ni.

West Ham United pawh replay an khelh a ṭul a, an mualah minute lina lekah Jarrod Bowen hmangin khung mah se an hum thei lo. Zanin dar 1:15 hian Briston City khelmual Ashton Gate-ah an lenglut dawn.