Thilsiam chhantute chawimawi

Lalthara-te Unau Foundation (LUF) chuan nimin khan Aijal Club-ah 'Thilsiamte chhantu pasalṭha chawimawina' an sem a; nungcha leh ramngaw humhalhnaa hma la ṭha mi paruk hnenah chawimawina thuziak leh Rs 1,00,000 ṭheuh an hlan.

Chawimawina dawngtute chu - social & environment activist Vanramchhuangi, ASEP president K Lalmuansanga, nungchate thla laa humhalhtu C Lalbiak­zama, Save Tlawng Project kalpui­tu Romalsawma, faina leh nungcha humhalha hma latu PC Lalnunzira leh ramsa thla laa thing ṭiak 5,000 chuang phun tawhtu C Lalsangpuia te an ni.

Chawimawina hlan inkhawmah hian LUF president Lalthara leh secretary Lalnunmawia Chuaungo ten thu an sawi.

LUF hi January 6, 2023-ah din a ni a, an din kumah hian leilung leh a chhunga awmte humhalhna lama hma la ṭhin pawl panga hnenah chawimawina Rs 1,00,000 ṭheuh an lo hlan tawh a ni.