MGNREGA hlawh sorkar laipuiah dil mek

Mahatma Gandhi National Rural Employment Guarantee Act (MGNREGA) hnuaia job card neite hna thawh hlawh tur sorkar laipuiah dil mek a nih thu Rural Development department chuan a tarlang a; dawhthei taka nghâk turin job card neite a ngen.

RD department chuan thuchhuah siamin, MGNREGA hnuaia inhlawh ṭhinte hlawh chu sorkar laipuiin a tum vek (100%) a nih thu leh, kum 2023 Krimas hma khan Mizoram sorkarin a tih tur ṭulte sorkar laipuiah a thehluh vek tawh thu a tarlang.

MGNREGA leh Operational Guideline angin MGNREGS hnuaia mipui inhlawhna chu Mizoramah thla tin tluang taka kalpui ṭhin a nih thu tarlangin RD department chuan, "Chutih laiin, tun hnaiah thingtlang mipuite inhlawhna central-in a la release loh avangin job card holder-te bank account-ah pawisa lut lo a awm nual tih hriat a ni," a ti.

MGNREGS hnuaia inhlawhna wage payment chu sorkar laipui duh dan leh ruahman angin online leh electronic payment vekin NeFMS hmangin kalpui a nih thu tarlangin RD department chuan, "Mipui inhlawhna mil zelin software - NREGASoft hmangin FTO (fund transfer order)-te MIS-ah siam zel a ni. FTO hmang hian sorkar laipui chuan hnathawktute/job card neitute bank account-ah Mizoram sorkara Finance department kaltlang loin direct-in inhlawhna pawisa a rawn thun ṭhin," a ti a; MGNREGS hnuaia inhlawhna bik chu sorkar laipuiin a tum vek thu a tarlang.

Sorkar laipuiin pawisa a rawn pek hunah inhlawhna pawisate chu job card neitute bank account-ah ṭheuh a luh leh nghal dawn avangin job card neite chu chî-âi lo tur leh dawhthei taka lo nghak turin RD department chuan a ngen a ni.

RD DEPARTMENT TARLAN DANGTE

▶ Mipui inhlawhna ang zelin Mizoram sorkara RD department chuan FTO hi MIS-ah district leh block tina thawktute kaltlangin a siamsak nghal zel.

▶ Tun dinhmunah Mizoram sorkarin tihkhawtlai (pending) a nei lo.

▶ Inruahman lâwk ngai hrang hrang - FTO siam leh UC thehluhte pawh 2023 Krismas hma khan tih vek tawh a ni.

▶ Sorkar laipuiah a rang lama mipui inhlawhna pe chhuak thuai turin Mizoram sorkarin a dil mek.

▶ Sorkar laipui pawhin a tahtawlin mipui inhlawhna leiba (liability)-te a rawn tihfel leh thuai beisei a ni.

▶ Mizoramah MGNREGS active worker mi 2,18,581 an awm mek.

▶ Job card neite tan sorkar kum kal mekah inhlawhna 69.96% pek a ni tawh.