Ruihhlo do turin tuna awm sate Kan ṭha tâwk tih inpawm a ngai - Excise Minister

Excise & Narcotics department (END) chuan nimin khan an pisaah kum thar atana inhlan tharna hun an hmang a, an hun hmanpuitu END minister Lalnghinglova Hmar chuan, ruihhlo do turin tuna thawktu awm sate chu an ṭha tawk tih an inpawm a ngaih thu a sawi.

Excise Minister chuan, ruihhlo do turin thawktu leh lirtheite indaih lo mah se, tuna neih saah lungawi phawt a ṭul tih a sawi a, "Mizoramah ruihhlo do hna thawk tak tak tur chuan Excise department hi thuam chak a ngai dawn. Mahse, sorkar sum leh pai dinhmunin a zir rih loh avangin tuna thawktu awm sate an inrin tâwk a ngai," a ti.

Thawktu awm sate ring tâwk loa tute emaw an awm belh hunah chauh chak taka hmalak tum a nih chuan ruihhlo donaah chak taka hmalak a theih dawn loh tih sawiin Lalnghinglova chuan, "Tuna awm sate hi ruihhlo do turin an ṭha tawk a ni tih an inpawm a ngai," a ti a, ruihhlo do turin thawktu tlem tih chu chhuanlama hman a ṭhat loh thu a sawi.

Lalnghinglova Hmar chuan, an department chungah Mizoram mipuiin rinna an nghat tih sawiin, "Zu leh ruihhlo do tak tak tur hian keini lo hi an awm chuang lo," a ti.

Zu leh ruihhlo tihrêm leh khuahkhirh kawngah tun aia ṭha zawkin an kal thei tih sawiin Minister chuan, "Kan kal dan ngai renga kan kal a nih chuan hma kan sawn lo tihna a ni ang," a ti a, 'Eng nge kan tih theih' tia ngaihtuah a ṭul thu a sawi.

Lalnghinglova Hmar chuan, kal dan thar a sawi avangin tuna thawktute chu an tling lo leh an ṭha lo tihna a ni lo tih sawiin, "Ram dinhmun thlirin kal dan ngai aia ṭha zawk a awm tih ngaihtuah a, chumi thleng thei tura inrintâwkna nen ke pên a ṭul," a ti.

Thawktute sawn kual chungchang sawiin Minister chuan, "Dan hnuaiah, dan angin zâwi zâwia insiamrem zel a ṭul. A ṭhatna tur a nih dawn avangin, kan kal dan ngai lo deuh hleka kan kalte pawh a ngai dawn a ni," a ti bawk.

Inhlan tharna hun hi END joint commissioner Peter Zohming-thanga'n a kaihruai a, END commissioner Z Lalhmangaiha pawhin thu a sawi a ni.