9th Assembly session hmasa ber a ṭiak : "Kan zavaiin ram kan enkawl dawn" - CM

December 12, 2023-a ṭan 9th Legislative Assembly of Mizoram session hmasa ber chu nimin khan a ṭiak. Chief minister Lalduhoma chuan, mipui sorkar din tum an nih angin ruling party chiahin ro an rèl ṭha an tih loh thu sawiin, "Kan zavaiin ram kan enkawl dawn," a ti a; MSSSB an ṭhiah dawn thu a sawi nawn.

Governor thusawi vanga lawmthu sawina motion khaikhawmtu Chief Minister chuan, "Governor-in a thusawiah corruption-ah zero tolerance a awm dawn a ti. Thu ṭha hi chu kan ngaihthla hnem tawh, House-ah ngei pawh," a ti a, thu ṭha sawi ngawt lo a, thil ṭha a taka tih a hun tawh thu a sawi.

Chief Minister chuan, Mizoram Subordinate Service Selection Board (MSSSB) an ṭhiat dawn tih a sawi nawn a, "MSSSB-in exam conduct mek an nei a, a zawh veleh kan ṭhiat dawn. MPSC rin mai ṭha kan ti a, an hna a hautak chhoh zel chuan kan thuam chak zel dawn. Political appointment awm theihna remchang board din ṭha kan ti lo. MSSSB hnalakah thil fel lo a awm tih chiang takin kan hria," a ti.

Lalduhoma chuan, 'Zawhtê chu tu nge ṭhi awrhtir ang,' 'Engtin nge a awrhtir ang' tih a pawimawh thu sawiin, "Central Bureau of Investigation (CBI) hnenah general consent kan pe dawn, Chief Secretary pawh instruction ka pe tawh," a ti a; Lokayukta-in CBI pek an rawt pathum lai sorkar hmasain an dan chah thu a sawi a ni.

Monitoring Committee an din dawn tih sawiin CM Duhoma chuan, "Party tin aṭangin an tel vek dawn, mi ṭha tur, corruption hua rawh dah rawh u. MPF, MKHC leh NGO-te nen kan ti ho. Party sorkar ni lo, mipui sorkar kan din dawn a, kan zavaiin ram kan enkawl tlâng dawn," a ti a; ruling chauhin ram enkawl ṭha an tih loh thu a sawi.

Governor thusawi chu a hriat phak chinah House member-te lungruàl tlànna ber nia a hriat thu sawiin CM chuan, "Kar khat lekah kum 5 chhunga kal dan tur zawng zawng sawi theih a ni lo. Governor hian ni 100 chhunga kan tih nghal tur a rawn ngai pawimawhin ka hria. Non working day paihin ni 100 hi March-ah a tawp turah kan ngai," a ti.

Lalduhoma chuan, ram buai vanga Zo hnahthlakte chungchang sawiin, "Manipur-a kan unaute chungchangah Union Home Minister nen kan inbe tawh a, hmaichhana sawi tlân ṭha kan ti. Myanmar-a kan unaute chungchangah pawh External Affairs Minister nen kan inbe tawh," a ti a, Zo hnahthlak raltlante tan theihtawp an chhuah tur thu a sawi.

Chief Minister chuan, eptu lam aṭanga duhsakna leh lawmpuina an dawn avanga an lawm thu sawiin, "Budget la pharh ngai lo kan ni a, puih kan ngai dawn. Kan ṭhat loh in hlau a, lawmawm kan ti. Kan kal dik loh chuan min beih tur thu in sawi hi a lawmawm, constructive criticism kan dawng thei reng. Politics chhe mi hmanga inthliar hranna neih vak vak kan tum lo," a ti.

CHIEF MINISTER SAWI DANGTE

▶ MSME (Ministry of Micro, Small & Medium Enterprises) hnuaiah quarantor-a ṭan a theih reng. Sorkar aṭangin awareness kan in pe lo, entrepreneur tam takin an chhawr lo. Quarantor, subsidy policy, etc. a awm sa vek.

▶ Home Minister-in Boundary Committee a din dawn mek, ramri buaia din chawp chûk chûk ṭha kan ti lo.

▶ SEDP zirtirtuah hian qualify lo, aikal la, party lâk, an awmna tura awm lote an awm a, chuti chungin financial year kal mek chhung chu chhawr an ni ang. Chumi hnua an awm dan tur chu Education Minister-in ṭul a tih angin a kalpui dawn.

▶ Kan policy mila budget duan kan duh avangin minister-te'n hun an mamawh deuh a, chuvangin nakkum February tawp emaw March-ah emaw budget session neih a ni ang.

▶ Thlai chi leina atana dah cheng vbc. 110 leh health care atana dah cheng vbc. 40 hi SEDP atana dah tih kan zep lo, a ṭangkai zawk dawn.

▶ Thlai thar leina tur a dah theih loh ang an ti a, ni thum chhungin kan dah.