9th Assembly session ṭan a ni: Speaker atan Lalbiakzama an thlang

Mizoram State Legislative Assembly pakuanaa session hmasa ber chu nimin khan ṭan a ni a; MLA tharte rinawmna thu tiamtira lak luh an nih bakah, Chalfilh biala thlan tlin Lalbiakzama chu Assembly speaker atan thlan a ni. Session hi vawiin leh naktukah chhunzawm leh a ni dawn.

Assembly session hi protem speaker Lalfamkima'n a kaihruai a; MLA-te chu rinawmna thu tiamtirin House member atan a la lut. House leader Lalduhoma'n thu a tiam hmasa ber a, mi dang zawng chu assembly constituency indawtin thu tiamtir an ni.

MLA-te'n thu an tiam zawhah speaker thlanna hun hman nghal a ni a; Protem Speaker chuan, speaker atan Chalfilh bialtu MLA Lalbiakzama chiahin hming a pek luh avangin chuhtu awm loa thlan tlin a nih thu a puang. Speaker thar chu House leader Lalduhoma leh opposition leader Lalchhandama Ralte ten speaker ṭhutnaah an hruai a, inkhawm a kaihruai zui nghal.

Speaker thar Lalbiakzama chuan, House member hmasate'n House zahawmna an kalpui tawh leh hnutchhiah tawhte chhawm nun an tum dawn tih sawiin, "State danga house ṭhenkhat anga inauh buai leh chetla mawi lo tak tak awm lohna tia sawi kan nih ṭhin kha vawn nun tlat kan tum dawn a ni," a ti.

Lalbiakzama chuan, Assembly House chu ram kalsiam sawihona tur a ni tih sawiin, "Kan ngaihtuahnate uluk takin hmang ila. Khai rual takin rorel kan tum ang a, neutrality maintain kan tum ang. Mimal inbeihna leh ram hnuk hlat lutuk ang chi ṭawngkam uchuak lutukte pumpelh kan tum hrâm hrâm tur a ni ang," a ti a, chutih rualin, member-te'n an dikna leh chanvo an hman theih nan rorelna kalpui a nih dawn thu a sawi.

Mimal aiin mipui ngaih pawimawh a duh thu sawiin Speaker chuan, "Kan ngaihtuahnaah mimal aiin mipui lo pawimawh fo se tih kan inchah duh," a ti a; mi thusawi lai tibuai loa ngaihthlaksak hrâm hrâm turin member-te a chah.

Speaker chuan, hun a pawimawh tih sawiin, "He sorkar hian resource kan neih ang angte a ṭangkai thei ang bera hman a ngai pawimawh em em a, House zahawm takah pawh hian hun hi ṭangkai taka hman kan tum dawn a ni," a ti.

Lalbiakzama chuan, "Inpawh tak leh innél taka House kalpui kan tum ang a, kan innèlnate, kan inpawhnate hi kan chak lohnaah kan inchhiarsak lo hrâm dawn nia. Zoram tan Lalpa lo lal ber rawh se," a ti a; Assembly speaker a nih avangin Pathian, a bial mipui leh House Leader chungah a lawm thu a sawi. Assembly Speaker leh Deputy Speaker turte executive lamah an kal fo thei tih sawiin ramri pèl deuha executive lama an lo vâk palh a nih pawhin hrethiam turin a ngen bawk.

Speaker hian Mizoram Legislative Assembly pakuanaa member mi 40-te MLA-a an tlin tawh dan a tarlang a; MLA ni hmasa ber Vanlalhlana chu kum 1998-ah House member a nih tawh thu leh, House leader Lalduhoma chu member ni ngun ber, vawi nga thlan tlin tawh a nih thu a sawi.

ASSEMBLY SPEAKER NI TAWHTE

1. Dr H Thansanga (1972-1975; 1984-1987)

2. Vaivenga (1975-1978; 1993-1998)

3. Thangridema (1978-1979)

4. Dr Kenneth Chawngliana (1979-1984)

5. J Thanghuama (1987-1989)

6. Hiphei (1989-1990; 2013-2018)

7. Rokamlova (1990-1993)

8. R Lalawia (1998-2003)

9. Lalchamliana (2003-2008)

10. R Romawia (2008-2013)

11. Lalrinliana Sailo (2018-2023)

MLA NI MEKTE TLIN TAWH DAN
(A hmasak dan indawtin)

1. Vanlalhlana : 1998, 2018, 2023

2. Lalduhoma : 2003, 2008, 2018, 2021, 2023

3. Lalchhandama : Ralte 2003, 2018, 2023

4. Lalthansanga : 2008, 2023

5. Dr K Beichhua : 2013, 2018, 2023

6. C Ngunlianchunga : 2013, 2018, 2023

7. Rasik Mohan Chakma : 2003, 2023

8. Robert Romawia Royte : 2018, 2023

9. Lalrintluanga Sailo : 2018, 2023

10. H Lalzirliana : 2018, 2023

11. K Laldawngliana : 2018, 2023

12. Lalrinsanga Ralte : 2018, 2023

13. VL Zaithanzama : 2018, 2023

14. C Lalsawivunga : 2018, 2023

15. Lalchhuanthanga : 2018, 2023

16. Ramthanmawia : 2018, 2023

17. Dr Vanlalthlana : 2018, 2023

2023-A TLING THARTE

1. Lalfamkima

2. Lalbiakzama

3. Prof. Lalnilawma

4. K Sapdanga

5. B Lalchhanzova

6. TBC Lalvenchhunga

7. Lalnghinglova Hmar

8. Baryl Vanneihsangi

9. F Rodingliana

10. W Chhuanawma

11. H Ginzalala

12. Lt.Col. Clement Lalhmingthanga

13. PC Vanlalruata

14. Lalmuanpuia Punte

15. Jeje Lalpekhlua

16. V Malsawmtluanga

17. Lalrinpuii

18. T Lalhlimpuia

19. Lalramliana Papuia

20. R Rohmingliana

21. Prova Chakma

22. Dr Lorrain Lalpekliana Chinzah

23. K Hrahmo