December 8-ah sorkar la lut dawn

December 8, 2023 (Zirtawpni) khian Raj Bhavan-ah Mizoram sorkar thar lak luh inkhawm, Swearing-in-Ceremony of Chief Minister and Council of Ministers buatsaih a ni dawn.

Ruahmanna siam dan chuan, December 8 chawhma dar 11-ah sorkar thar lak luh inkhawm ṭan a ni dawn a, Governor Dr Hari Babu Kambhampati chuan chief minister tura ruat rinawmna thu tiamtirin a la lut ang a, chumi hnuah council of minis­ter turte a la lut leh ang.

Minster-te lak luhna inkhawm buatsaih dan tur hi nimin khan chief secretary Dr Renu Sharma hoin CS conference hall-ah sawiho a ni a, a kaihhnawih department hotute an tel.

Chief Secretary chuan, sorkar lak luh inkhawm chu a pawimawh em avangin chanvo leh mawhphurhna nei department-te'n an tih tur an chian a ngaih bakah, ṭha tak leh zo taka an hlen chhuah a ṭul thu a sawi a; department aiawhte chu a ṭha thei ang berin inbuatsaih lâwknate ruahman turin a chah a ni.