Synod Inkhawmpui ṭan a ni

Mizoram Presbyterian Kohhran rorelna sang ber, Synod Inkhawmpui vawi 100-na chu nizan khan Mission Veng biak-inah ṭan a ni a, vawiinah rorel ṭan a ni ang. Inkhawmpui thupui chu 'Kraws pua Isua zui' tih a ni.

Synod Inkhawmpui vawi 100-na hi Mission Veng Pastor Bial-in Mission Veng Kohhranah an thleng a, vawiin hian moderator kal chhuak Rev. Dr C Chawng­hmingliana'n Rev. R Vanlalnghaka hnena moderator mawhphurhna a hlan hnuah rorel a ni dawn.

Vawiin aṭanga December 9, Inrinni thleng chhun lamah rorel a ni ang a, zanah vantlan Pathian biak inkhawm a awm ang. December 10, Pathianni chawhmaah pastor nemngheh leh probationary pastor dahngheh inkhawm neih a ni dawn a, chawhnuah Lalpa Zanriah Sakramen ṭheh a ni ang.