Darbu Music App : November-a hralh tam ber Olympus Music

Darbu Music App-in November thla an app kaltlanga hla an hralhchhuah, Darbu Exclusive Sale-ah Siaha lam, Olympus Music chu pakhatna a ni.

November thla chhunga hralh chhuah tam zingah hian Leprosy Mission Choir, Vohbik, Lighthouse leh Kimkima te chu Top 5-ah an lang bawk.

Olympus Music hi kum 2014-a artist paliin an din a ni a, an din tirh hian an la naupang tlang a, studio record man tur pawh nei loin, laptop-ah recording-te tiin hla eng emaw zat an tichhuak a, charity concert-te pawh an lo huaihawt ve tawh bawk. Zirna avanga hun eng emaw chen an chawlh hnuah, kum 2020 khan din thar lehin music production an chhunzawm a; music, songwriting, vocal mix leh master thlengin an inbuaipui vek a ni. Member hi 15 awm tawhin, 'Hmiala' album bikah hian producer- 03 Beatz niin, artist - Domi, Cosco, Jevol, Son Syhly, Diddle MRK te an ni. He album hi July thla aṭangin an buaipui a, November 21 khan tlangzarhin, Darbu Music app-ah lei theih tura dah chhuah a ni.

November thla chhunga Darbu App-a hla ngaihthlak/play tam ber chu Aengi& Rosalyn te bawk an ni leh a, "Hmiala' album-a hla eng emaw zat chu top 10-ah an lang. Hla play tam zual panga zingah hian K.Hminga hla pahnih an rawn lang bawk. K. Hminga hian December 8-ah a studio album hmasa ber tur, 'Ka Ngaih, Zawng Ho' tih chu Darbu App-ah hian tihchhuah a tum.