KHAWTHLIR

Dry day puang

Excise & Narcotics department chuan Mizoram inthlanpuia vote tlate chhiar ní, vawiin hi Mizoram pumah zu zawrh leh hralh chhuah phal loh ní (dry day) a nih thu a puang. Dry day hi Election Commission of India thupek anga puan a ni a, sipai canteen aṭangin zu hralh chhuah khap a ni.

Hàlpuah khap rêl

Khawzawl bawrhsap K Lalrohlua leh district thuneitute chuan December 1, 2023 khan kumin Krismas leh 2024 kum thar vuakveta dan leh thupek kenkawh dan tur an sawiho. Hunpui vuakvêtah silai lem a mu nei, hâlpuah, hâlmawi leh meithallàwnte khap an rêl. Ruihhlo leh dan phal lohte khauh taka khap tlat ni se an ti.

A thlawna inentirna

Agape Multispeciality Hospital, Aizawl chuan an din champha vawi khatna pualin December 1, 2023 khan a thlawna inentirna an buatsaih. Doctor-te'n mi 270-te hriselna dinhmun an enfiah a; ultrasound, x-ray, ECG leh thisen leh zun endikte a thlawnin an tihsak a, endoscopy, colonoscopy, minor surgery leh ha enkawlte a man chanvein an tihsak bawk.

Pro pastor la thar

Mizoram Synod chuan kumin Synod inkhawmpuia dahngheh turin probationary pastor turte December 1, 2023 khan a la thar a; Pastoral hnuaia awm tur mi 12, Synod Mission Board hnuaia awm tur pathum leh field worker pastor tur pathum lak a ni.

Rualbanlote'n Lawmthu sawi

Mizoram Blind Society chuan World Disabled Day (December 3) puala thuchhuah siamin, Mizorama rualbanlo te, rualbanlo enkawltu pawl te, Mizoram sorkar hruaitu te, kohhran leh khawtlang hruaitute leh rualbanlote khawngaiha ṭanpuitu zawng zawngte chibai an bûk tih an tarlang a, "Rualbanlote ṭanpui ṭhin zawng zawng chungah lawmthu kan sawi a ni," an ti. Rualbanlote Ni hi kum dangah chuan uar taka hman a ni ṭhin a, kuminah chuan Pathianni a nih avangin an hmang lo a, thuchhuah an siam a ni.