Mizoram Government Drivers’ Association chuan nimin khan Dawrpui Mul­tipurpose Hall-ah General Conference vawi 28-na an hmang a, deputy chief minister Tawnluia'n a hmanpui.

Tawnluia chuan, sorkar driver-te dinhmun sorkarin a hriatpui thu sawiin, "Driver-te tel lo chuan sorkar hnathawk tam takte'n hna an thawh tur angin an thawk thei lo a, sorkar department hrang hrangah motor enkawl piah lamah, sorkar hnathawkte an thawhna hmuna hunbi dik tak vawng chunga motor-a phurtu in ni," a ti a; motor-a chuangte nunna pawh driver-te kutah thui tak a innghah thu a sawi.

Deputy CM chuan, sorkar motor khalhtute fimkhurna zarah sorkar motor chesual a tam lo a, private motor chesual aiin a tlem zawk tih a sawi a; "Hnathawkte dinhmun hre chiang a, theihtawp chhuah turin sorkarin ṭan a la zel a, hawihhâwmna leh bengvarna chhawm nung zel ang che u," tiin a chah.

Conference-ah hian chawhmaah kum 2018-19 chhunga an member thi mi 33-te sûnna hun an hmang a, chawhnuah kum 2020-22 chhunga hruaitu tur an thlang. Mizoram Government Drivers’ Association hi September 4, 1964-ah din a ni.

Share this Post