P&E dept.-in review meeting an nei

Power & Electricity (P&E) department chuan nimin khan Aijal Club-ah sorkar kum kal mek, 2019-20 chhunga an department hnathawh thlir lêtna 'Works Review Meeting' an hmang a, P&E minister R Lalzirliana'n a hmanpui. Meeting-ah hian P&E department-a SDO chin chung lam an tel a ni.

R Lalzirliana chuan, kawlphetha hnianghnâr pe tura P&E department-in theihtawp chhuaha hna an thawhnaah fimkhur a ngai hle tih sawiin, "Tihsual palha thihna thlen thei thil a nih ṭhin avangin officer leh staff-te inpawh tlang leh fimkhur theihtawpa hna in thawh ṭhin a ngai a ni," a ti.

P&E department-a thawktu indaih lohnain a beng a thlen thu leh hmalak a tum thu sawiin R Lalzirliana chuan, "A dik loa ti ṭhinte chu an mualpho mai tur a ni," a ti a; department-in mimal sum cheng vbc. 15 a bat chu chinfel ran dan zawng tur te, project hnathawh a hun taka zawh a nih theih nan ṭan la tur leh, an thiamna ram leh mipui tan nasa leh zuala hmang turin a chah.

Meeting kaihruaitu P&E engineer-in-chief Lalduhzuala Sailo chuan, tunlaiin Aizawlah transformer overload vanga chhia a tam thu sawiin, chu'ngte chu engineer-te'n an tih tur an tih tâwk loh vanga thleng a nih leh nih loh inen chian an mamawh thu a sawi a; thawktu indaih loh vanga sub-station hawn theih loh a awm nual thu te, maintenance material an tlâkchham vanga harsatna an tawh thute a sawi bawk.



Share this Post

Login to comment
No Comments