Vanglaini - Civil services coaching sawiho

KHAWTHLIR

Bungrua hlân

Tuirial constituency bialtu MLA Andrew H Thangliana chuan a bial chhunga YMA branch hrang hrang hnenah February 12, Nilaini khan bungrua/hmanrua chi hrang hrang a hlân. MLA hian a biala YMA branch zawng zawng hnenah bawngtuthlawh, suahdúr, thîrtiang, hruizén leh silpauline pek turin a ruahman a, a thawh khatna atan Nilaini khan Thingdawl, Bualpui, Kawnpui leh Hortoki-a YMA branch-te hnenah an hlan a, nimin khan Zanlawn, Serkhan, Lungdai YMA-te hnenah an hlan leh bawk.

Lengpui-in phal lo

Lengpui khuaa tlawmngai pawl hrang hrangte chuan thuchhuah siamin, an khaw ram chhungah sa pêl, sava veh leh dan phal loh hmanraw hmanga luia nungchate man an remti lo tih an puang. An thuchhuak pawisa loa ti lui man an awm chuan thuneitute hnenah an pek zel tur thu an tarlang.

Nupui sât hlum

K Lalthanṭhuama (49), Champhai Vengsang chuan February 12, Nilaini tlai khan a nupui Lalnunziri (48) a sât hlum. K Lalthanṭhuama'n police-te hmaa a sawi danin, a nupui nen an inhau a, a nupuiin a chháng lêt chu thinrimin chempui a la a, a sât a ni. A nupui a sah hnuah K Lalthanṭhuama chu in aṭangin a tlân chhuak a, mipuiin an man hnuah police-in an la a, jail-ah dah a ni. Lalnunziri hi damdawi-in panpui a nih hnuah a hliam tuar loin a thi. K Lalthanṭhuama leh Lalnunziri te hian fa pasarih an nei a ni.

MLA-in hmanpui

Nimin khan Kulikawn YMA Hall-ah MUP Aizawl South-II Area Conference vawi 20-na neih a ni a, Champhai North bialtu MLA Dr ZR Thiamsanga, Health & Family Welfare Board vice chairman-in a hmanpui. ZR Thiamsanga chuan, upate an hlut thu sawiin, upate chu an thiamna leh tawnhriatte ram leh hnam tan pe chhuak zel turin a sáwm a, "Sorkarin The Mizoram Maintenance and Welfare of Parents and Senior Citizens Rules, 2014 hnuaiah upate tan theihtawp a chhuah zel dawn a ni," a ti.

Innovative challenge

Entrepreneurship Development Centre (EDC) leh Lawngtlai College-te chuan nimin khan Lawngtlai College auditorium-ah District Innovative Challenge on Business Solution to Sustainable Development Goals an buatsaih. He hun hi Lawngtlai College principal T Thang-

ṭhuama'n a kaihruai a, EDS project coordinator Lalrinnunga'n EDS hmalaknate a sawi. Innovative Challenge-ah hian a ti ṭha ber team-in Rs. 30,000, pahnihnain Rs. 20,000, pathumnain Rs. 10,000 an dawng dawn a ni.

Home Science Conference nei

Mizoram Home Science Association chuan nimin khan Zirtiri Residential Science College-ah General Conference vawi khatna an hmang a, Higher & Technical Education deputy secretary HL Dingliana'n a hmanpui. He hunah hian Mizorama Home Science zir chhuak tawh mi ṭhahnem tak an tel a ni. Zirtiri Residential Science College-ah hian kum 1980 aṭangin Home Science zirna hawn a ni.

DAWNTISEI

Civil services coaching sawiho

Nimin khan deputy chief minister Tawnluia hoin Mizo ṭhalaite tana civil service (IAS, etc.) coaching kalpui zel dan tur leh ṭhalaite zingah all India service leh central service-a inziak tling an tam theihna tura Mizoram sorkarin Mizoram Youth Commission (MYC) hmanga hma a lak dan tur sawiho a ni.

Sawihonaah hian MYC chairman Dr Vanlalṭanpuia, MLA, chief secretary Lalnunmawia Chuaungo, Finance secretary Vanlalchhuanga, Planning secretary Dr C Vanlalramsanga, MYC member-te leh mithiam sàwm bikte an tel.

Meeting chuan, civil service lama kal tumte tan lehkhabu ṭha chhiar tur chhawp te, ṭhalaite zinga a thiam bikte pualin test buatsaih a, chuta ṭanga thlante chu Crash Course coaching nei tura coaching centre ṭha a lut tura buaipui (sponsor) an rel a; UPSC prelimimary examination-a inziak tlingte chu main examination an inbuatsaih turah senso tumsak chhunzawm zel ni se, an ti bawk.

Share this Post

Login to comment

No Comments