Sustainable Development Goal - India Index-ah Mizoram a hniam : DoNER Secretary

Development of North Eastern Region (DoNER) secretary Dr Inder Jit Singh chuan nimin khan State Referral Hospital (Zoram Medical College) a tlawh a, chumi hnuah Raj Bhavan-ah Governor PS Sreedharan Pillai a kâwm. Inder Jit Singh chuan, NITI Aayog-in tun hnaia Sustainable Development Goal India - Index & Dashboard 2019-20 a tihchhuahah Mizoram dinhmun a hniam thu leh ṭan lâk nasat a ngaih thu a sawi.

Larsap nen an inkawmnaah Dr Inder Jit Singh chuan, Mizorama a kal chhan leh thil tihte sawiin, Mizorama project kal laite a hmunah a tlawh bakah, Mizoram sorkar hotute nen thil pawimawh an sawiho thu a hrilh a; NITI Aayog-in tun hnaia a tihchhuah Sustainable Development Goal India - Index & Dashboard 2019-20 a Mizoram dinhmun sawipuiin, Mizoramin ṭan lâk nasat a ngaih thu a sawi.

DoNER Secretary chuan, NITI Aayog zirchiannaah, sector pawimawh zual Economic sector, Infrastucture sector leh Health & Sanitation sector-ah Mizoram chu state 28 zinga a mawngphah zingah a awm tih a sawi a, "Tun hnaiah Mizoramin ṭan a la thar hi thil lawmawm tak a nih rualin, hmalakna tur a ngah hle a ni. Health sector-ah Mizoramin AIDS/HIV vanga harsatna a neih mek chu harsatna lian tham leh ngaih pawimawh ngai bik a ni," a ti.

Dr Inder Jit Singh chuan, project kal mek a tlawhte chu hna thawh zawh hun bituk aia kum hnih aṭanga a aia rei féa khawtlaite a nih hlawm thu sawiin, "Mizoram bakah hmarchhak state-a project thawh hun chhunga zawh theih lohte vangin Central sorkarah DoNER tan ministry tin aṭanga 10% fund sum dil belh leh hâi chhuah a harsat phah a ni," a ti. Mizoram tan bik tourism leh skill development sector-ah hnathawh tur a tam tih sawiin, "Sum hai chhuah kawngah chak zawka hma an lak a ngai," a ti a; heng sector pahniha Mizoramin sum a hai chhuah a la tlem hle tih a sawi.

Governor PS Sreedharan Pillai chuan, DoNER hotute'n ṭhahnemngaia Mizoram an rawn zir chiang chu lawmawm a tih thu sawiin, chak zawka DoNER leh NEC-ah project thehluta bawhzui turin inpuahchah mek a nih thu a sawi a, "Project kal mekte pawh a hun pangngaia thawh zawh a nih theih nan sorkarin theihtawp a chhuah dawn a ni," a ti.

Dr Inder Jit Singh chuan ZMC a tlawhnaah, NITI Aayog-in Sustainable Development Goals (SDG) index a buatsaihah kawng hrang hranga tehin, Mizoramin hmasawn a ngai hle tih a sawi a, "A bik takin health sector-ah ṭan lak nasat leh zual a ngai," tiin, Mizoram hniamna laiah ṭang turin a fuih a; Zoram Medical College tihchangtlunna turin a theihna apiangah puih a inhuam thu a sawi.

DoNER Secretary chuan, Zero Hunger-ah erawh chuan Mizoram chu India ram pumah pahnihna a nih thu sawiin, "Zero Poverty-ah pangana a ni a, heng kawngah hi chuan Mizoram hmalakna a chhuanawm hle a ni," a ti.

Mizoram sorkara Health Secre­tary H Lalengmawia chuan, Health department lama thawktu indaih lohna te, ruhrel din tur hmachhawp tam tak la awmahte leh thil dang danga harsatna awmte sutkian a nih theih nan DoNER puihna Mizoramin a mamawh thu a sawi a ni.

Sorkar thuchhuah tarlan danin, Zoram Medical College-ah hian MBBS zirlai 198 an awm a; lecture hall-ah ZMC hotute nen an inkhawm a, ZMC director Prof. L Fimate-in kaihruaiin, registrar Dr Jane R Ralte-in ZMC chanchin tlangpui a sawi.

DoNER Secretary hian February 12, Nilaini khan Reiekah Reitlang Organic Turmeric Producers hmalakna leh Reiek tlang tourist resort-a DoNER sum hmanga Tourism department hmalaknate a en a ni.





Share this Post

Login to comment
No Comments