Zaninah Mizo film 'Keimi' tlangzarh dawn

Mizo film dangdai, traditional fiction behchhana siam 'Keimi' chu zanin dar 7 hian Vanapa Hall-ah tlangzarh a ni dawn ta.

'Keimi' film hi Christo Pa ziah leh direct a ni a, story plot ṭhenkhat hi Dawm Pachuau ziah a ni bawk a, Mizo thu leh hla thiam Aba Hmar kuthnu hmuh tur a awm bawk. Cinematographer hi Lalbiakthansanga (B Lego Pictures) a ni. He film-a changtute hi a tam zawk chu film industry lama mi thar an ni a; Khawhai, Tlangpui, Biate, Farkawn, Leilet (Myanmar) bakah Chalrang, Lungtan leh Aizawl mite an ni.

He movie siam tura inbuatsaih nan hian kum khat chuang hun hman niin, shooting hi thla hnih chhung neih a ni. Vangtlang, Chalrang, Lungtan, Khawzawl, Dungtlang, Vangchhia, Tiau leh Chawngtui ram chhungahte changin, mi 100 chuang an inhnamhnawih. A changtupa, Hranga part chu Khawhai pa Zohmingliana'n hnehsawh takin a chang a, a changtunu Zonunpuii Hnamte pawhin film puitling a chan vawikhatna tih hriat loh khawpin a role a hnehsawh. Changtu dangte pawhin an part ṭheuh an hnehsawh tlang hle.

'Keimi' film hi zirtir nei tura duan a ni hran lo a, Mizo pipute thawnthu behchhana ennawm thei tura phuah chawp liau liau a ni tih director Christo Pa chuan a sawi. "He film atan hian tha leh tui kan seng nasa hle a, Pathian ṭanpuina pawh kan dawng nasa. Film member-te hi chang ringawt lo, hnatlan a ngaih pawha nileng ṭhak ṭhaka hnatlang kan tam. Khawhai MUP phei chu Joint MUP tawpa thawh chhuah an ngah khawp mai. A man phu tawk viau turin Zo hnahthlak mipuite tan ennawm chu kan buatsaih ve tawkin kan inhria," tiin a sawi.

Show angin an kalpui phawt dawn a, a hnuah streaming apps lamah an dah ang. December thla tawp lamah chuan an dah chhuah hman an ring tih Christo Pa chuan a sawi bawk.