MZU Southern Campus hmun tur enfiah

Mizoram University (MZU) Southern Campus hmun tura rua­hman Pukpuia Mausep ram chu February 11, Thawhlehni khan Mizoram Youth Commission (MYC) chairman Dr Vanlalṭanpuia, bialtu MLA hoin MZU registrar Prof. Lalnundanga, controller Prof. Lalnuntluanga, Lunglei NGO Coordination Committee hruaitute leh Pûkpui khawtlang hruaitute'n an enfiah.

Dr Vanlalṭanpuia chuan, MZU Southern Campus chu Mizoram mipui, a bikin chhim lam district-te tan malsawmna ropui tak a nih thu a sawi a, "Campus leh building ṭha leh changtlung tak din ngei a nih theih nan sorkarin theihtawp a chhuah zel dawn," a ti a; mipui, khawtlang hruaitute leh NGO-te chu sorkar hmalakna ṭawiawm tur leh fin­chhuah turin a ngen.

Prof. Lalnundanga chuan, MZU Southern Campus din turah, "Higher Education Funding Agency (HEFA) aṭanga hmalak tur a ni a, tih tur ṭul tih hmasak ngai ang angte chak taka bawhzui a ni ang," a ti a; a hma thei ang bera hna ṭan a nih tur thu a sawi.

Pukpui VC president V Rodinga chuan, ram an pek tur chu zau tak a nih thu sawiin, "Revenue official-te nen a ram zau zawng la teh fel tur a ni a, chhût dan chuan acre 300 chuanga zau a ni," a ti.



Share this Post

Login to comment
No Comments