KHAWTHLIR

Bible Sunday

Naktuk Pathianni, December 3 hi Bible Sunday a ni a, Mizorama kohhrante'n an hmang dawn. Thupui turte chu - chawhnu inkhawmah 'Pathian thu thiltihtheihna' tih leh zan inkhawmah 'Mi tin ta tur Pathian thu' tihte a ni. Bible Sunday hi Bible thehdarhna lama intihchak tharna atana hman ṭhin a ni a, Bible Society of India, Aizawl Auxiliary office aṭangin hman dan tur an ruahman ṭhin a, BSI-a tel kohhrante'n an hmang ṭhin a ni.

Minister thlah

School Education department chuan nimin khan SAD conference hall-ah School Education minister Lalchhandama Ralte thlahna hun an hmang. Lalchhhandama Ralte leh School Education secretary Lalzirmawia Chhangte ten thu an sawi a ni.

Nilai leh Beihrual Thupui tichhuak

Mizoram Presbyterian Kohhran chuan kum 2024-a Nilai leh Beihrual Thupui zirlaibu tur a tichhuak. Nilai leh Beihrual Thupui hi bu 70,000 siam a ni a, Synod Bookroom hrang hrangah lei theih a ni. Thupui chu 'Kristiante mawhphurhna' tih a ni a, Missionary Training College principal Rev. Vanlalrova Khiangte ziah a ni. Synod Calendar 2024 leh 2024 puitling sunday school leh naupang sunday school zirlaibute tihchhuah a ni tawh bawk.

Lehkhabu tlangzarh

Rev. K Lalthanliana lehkhabu, 'Rev. K Lalthanliana Robawm 2-na' tih chu nimin khan Rev. K Lungmuana'n Synod Multipurpose Training Centre-ah a tlangzarh. Lehkhabuah hian hla 122 a awm a, tonic solfa nen dah a ni.

Centre hawng

Sorkar laipuia Ministry of Panchayati Raj bultuma Rastriya Gram Swaraj Abhiyan (RGSA) kaltlanga sum hmuh hmanga Thenzawl Handloom Design Training & Production Centre, Thenzawl sak thar chu nimin khan LAD secretary Teresy Vanlalhruaii'n a hawng. In sakna atan cheng nuai 68 hman a ni a, Thenzawl West VC-in an sa a ni.