Vanglaini - Mizorama hmasawnna hnathawh thlirlêt

KHAWTHLIR

Minister-in enfiah

Aizawl West-II bial-tu MLA Lalruatkima, minister of state chuan nimin khan a bial chhung a Aizawl Smart City scheme hnuaia hna thawh tur hrang hrang a enfiah. Lalruatkima chuan, hmasawnna ruhrelte chu khawtlang mipui tana ṭangkai leh huam zau thei ang ber tura tih a nih thu sawiin, "Multi level car parking leh indoor stadium chei ṭhat turte hi amah leh amah inenkawl zui thei a nih theih nan ngaihtuahna sên a ṭul," a ti a; Smart City hnuaia hmasawnna hna thawh turah Aizawl West-II chhunga khawtlang hruaitute chu sorkar hmalakna thláwp turin a sawm.

SDG training

Nimin khan Mamit College-ah Entrepreneurship Development Centre (EDC) Mizoram hnuaiah Innovative Challenge on Sustainable Business Solution to Development training buatsaih a ni a, district bawrhsap Dr Lalrozama'n a hawng. Training-ah hian mithiamte'n zirlaite thil pawimawhte an hrilhfiah a, vawiinah chhunzawma zawh a ni ang.

SHC member ruat

Sinlung Hills Council Act, 2018 Section 5(3) leh Sinlung Hills Council (SHC) Chief Executive Member-in nomination a siam angin, Thangliensung chu SHC-a nominated member a ruat a ni. Hemi chungchangah hian GAD chuan February 5, 2020 khan hriattirna a chhuah a ni.

TNT tanpui

MSU chuan a din champha vawi 19-na pualin nimin khan TNT, Zuangtuiah ṭanpuina sum leh buhfai ṭhahnem tak an hlân. TNT-ah hian mi 1,855 an awm mek niin an tarlang.

MNYF hruaitu

MNF ṭhalai, Mizo National Youth Front (MNYF) office bearer hlui leh tharte chuan nimin khan Mizo Hnam Runah mawhphurhna an inhlan. MNYF-ah hian president ni lai Lalrinawma, MLA chu president a ni zui dawn a, vice president ṭhin H Ramdinliana leh Lalremruata Chhangte te chu Lalzahawma Khiangte, treasurer ni laiin a thlak a, treasurer atan H Lalroliana dah a ni.

DAWNTISEI

Mizorama hmasawnna hnathawh thlirlêt

Development of North Eastern Region (DoNER) secretary Dr Inder Jit Singh hoin February 11, Thawhlehni tlai khan Aijal Club-ah DoNER ministry leh North Eastern Council (NEC) kaltlanga Mizorama project leh scheme hrang hrang thawh mekte thlir letna (review meeting) neih a ni.

Dr Inder Jit Singh chuan, Mizoramin chak zawka hma a sawn theih dan tur te, hmasawnna tehfung hrang hranga dinhmun sang zawka a awm theih dan tur leh Mizo mipuiin hma an sawn theih dan turte ngaihvena Mizorama zin a nih thu a sawi a; "Hmasawnna hna thawhna tur sum a tlem lo a, Central ministry tinin hmarchhak hmasawnna atana an budget aṭanga 10% an dah hran (Non-Lapseable Central Pool of Resources) chu ministry tam takin an hmang bâng nasa a, chawhrualin sum tlingkhawm aṭanga 50% âwrh chauh hman a ni," a ti.

NLCPR sum hman bân a tam chu state sorkar mawh a ni bik lo tih sawiin Inder Jit Singh chuan, "Ministry lamte an inenfiah a ngai ve tho a ni. Chutih rualin, NEC project bikah NEC-in a vilzuina lamah ṭan an lak a ngai," a ti a; sorkar kum tharah hna thawh tur ruahman (proposal) thar tam zawk a awm a beisei thu a sawi.

DoNER Secretary chuan, Aizawla Cable Car Transport Project, cheng vbc. 1,993 hû chungchang sawiin, NITI Aayog-in a pawm dan leh sum tum turin Ministry of Road Transport & Highways tihchian a nih tawh thu a sawi. Thingpui, mau leh rua, sangha khawi, ranvulh leh tourism-te chu Mizoramin theihna a neih ṭhatna nia sawiin, chu'ngahte chuan ruahmanna lian tham siam turin Mizoram sorkar official-te a chah.

Chief secretary Lalnunmawia Chuaungo pawhin thu sawiin, hmasawnna leh ruahmanna kalpui kawngah Mizoram sorkarin theihtawp a chhuah thu a sawi a; review meeting chuan Mizoram hmasawnna atan rah ṭha leh thil thar a hrin chhuah ngei a beisei thu a sawi bawk.

Review meeting-ah Mizoram sorkara department ṭhenkhat hotu te, DoNER leh NEC-a hotu dangte an tel a ni.

Share this Post

Login to comment

No Comments