Zu khap kâra 2023-a zu man lt. 84,742.290 leh ûm 30,125

Mizoramah zu khap mek a ni a, zu khap a ni chungin Excise & Narcotics department (END) chuan kumin January aṭanga nimin thleng khan rakzu litre 84,742.290 leh sapzu ûm 30,125 an man.

END aṭanga thu dawn danin, kumin January 1 aṭanga nimin thlengin rakzu litre 84,742.290 an man bakah, zu bilh lai ṭín 1,85,699 an tichhia a; sapzu an mante chu Indian made foreign liquor (IMFL) ml. 750 ûm 22,703, ml. 375 ûm 3,351 leh ml. 180 ûm 3,677 bakah, ram danga siam ûm 394 a ni. Myanmar zu (BEDC) litre 2,621.200 man a ni bawk.

END chuan, Mizoram MLA inthlanpui vuatvetah zu leh ruihhlo hmanga vote inlei tumna emaw, inthlanna kaihhnawiha dik lo taka zu leh ruihhlo leh a kaihhnawih hman vanga thil man an nei lo tih an tarlang.