Zirlaibu-ah moral education/science Telh turin SSU-in Minister an ngen

Students' Self-Support Union (SSU) General Headquarters hruaitute chuan nimin khan School Education minister Lalchhandama Ralte chu a pisaah an kâwm a; sorkar hmalaknaa rawtna an neihte thlenin, elementary education subject-ah moral education/moral ­science telh leh turin an ngen.

SSU hruaitute chuan, tun hmaa zirlaibua moral education/moral science subject awm ṭhin, hun eng emaw chen a awm tawh lo chu subject-ah tel leh thei se an duh thu sawiin, moral education/moral science subject chu elementary section (pawl 8 chin hnuai lam)-ah telh leh turin Education Minister an ngen a ni.

School Education Minister chuan, SSU thu thlen chu pawimawh a tih thu sawiin, a hlawhtlin theih nana hmalak nghal a tum thu leh theihtawp chhuah a tum thu a lo sawi nghal tih SSU chuan an tarlang.

SSU hruaitute chuan, MNF sorkara zirtirtu transfer & posting rules fel tak siam a ni ta chu lawmawm an tih thu Minister hrilhin, thingtlangah zirtirtu indaih lohna a la tam avangin a taka hman nghal a nih theih nan hma la turin an ngen nghal a ni.



Share this Post

Login to comment
No Comments