Chanchinbu editorial ṭha lawmman hlân

Mizoram Legislative Assembly inthlanpui vuakveta vote thlâk pawimawhzia mipui zirtirna lam editorial-a ziak ṭha chanchinbute hnenah Aizawl bawrhsap Nazuk Kumar, district election officer ni bawk chuan nimin khan a pisaah lawmman a hlàn.

Aizawl DEO hian Mizoram inthlanpuiah vote a tlâk ṭhat theih nan leh voter-te'n duhthlanna dik an siam theih nan Systematic Voters’ Education and Electoral Participation (SVEEP) hnuaiah chanchinbute tan editorial competition, 'Bouquet of Words' a buatsaih a ni.

Lawmman dawngtu chanchinbute chu - Vanglaini, The Aizawl Post leh Virthli te a ni a, lawmmanah thuchei leh Rs 5,000 ṭheuh pek an ni.

Bawrhsap Nazuk Kumar chuan, Mizo mipuite chu dan zah thiam leh ngaih pawimawh nachang hre berte zinga mi an nia a hriat thu sawiin, chuta tan chuan press mite'n hna pawimawh tak an thawh thu a sawi a; Mizoram inthlanpuiah journalist-te hna thawh danah a lawm thu leh, sorkar an ṭawiawm dan leh inthlan felfai tak nei tura an hmalaknaah a lawm thu a sawi bawk.

Lawmman inhlannaah hian Aizawl District SVEEP Committee aṭangin Assistant Nodal Officer leh member-te an tel a ni.