KHAWTHLIR
NEC hotuin MADC tlawh
North East Council (NEC) hnuaia Tourism & Industries director R Lalrodingi chuan nimin khan Mara Autonomous District Council (MADC) sorkara Industry department a tlawh a, an hmalaknate a enfiah. R Lalrodingi chuan, MADC sorkar hnathawkte chu industry lama hma an sawn theihna atan theihtawp chhuahpui a inhuam thu a hrilh a, tourism lama hmasawn turin theihtawp chhuah a pawimawh thu a sawi bawk.
Damdawi-in endik
Damdawi-in fai leh thianghlim inelna Kayakalp 2023 hnuaiah nimin khan Saitual District Hospital chu endik a ni. Kumin hi Kayakalp hnuaia inelnaah Saitual District Hospital an tel ṭum khatna a ni.
Sangha khawi zir
Agriculture department leh Fisheries department chuan nimin khan West Phaileng khuaa sangha kháwitute tan West Phaileng Community Service Centre-ah sangha khawi leh enkawl zirhona an buatsaih. Riverine Conservation & Fisheries Act (2022) & Rules (2019), Common Carp Breeding, Construction of New Pond leh Pond Construction & Management chungchang an inzirtir a ni.
Career Mela
Khawzawla Samagra Shiksha District Project Office chuan nimin khan Zaingen YMA Hall-ah 'Built the future' tih thupui hmangin zirlaite tan Career Mela an buatsaih. Mela-ah hian Khawzawl district-a khaw hrang hrang aṭangin high school leh higher secondary school zirlai 188 leh zirtirtu 22 an tel a ni.
KCC loan sawiho
Saitual district-a thuneitute chu an chairman Dr Lalngura Tlau, bawrhsap hoin November 28, Thawhlehni khan bank aiawhte nen an ṭhukhawm a; Ghar Ghar Kisan Credit Card Abhiyan (Household KCC Campaign) chungchanga hmalak dan an sawiho. DC chuan, PM Kisan beneficiary zinga KCC loan dawng theite'n dawng vek thei se a duh thu a sawi.