Ram hausa kan nih theihna tura hmalak hi sorkar mawhphurhna - PC

Peoples' Conference party hruaitute chuan nimin khan an pisaah thuthar thehdarhtute an kâwm a; ram hausa nih theihna tura hmalak chu sorkar mawhphurhna a nih thu an sawi.

PC president Vanlalruata chuan, Mizoramin hma a sawn tak takna turin ram inrêlbàwl dan siamṭhat a, sorkar inenkawl leh inrêlbawlna hautak lutuk tihreh a ngaih thu a sawi a, "Hemi atan hian sorkar inrêlbàwl dan leh sum enkawl dan siamṭhat a ngai. Ram hruaitute'n an eiruk loh a, eiru an hrem a ṭul. Eng party pawh sorkar se, kan ram an hmangaih a nih chuan heng hi tih theih a ni a, keini chu sorkar ila kan ti ngei ang," a ti.

Vanlalruata chuan, ram hausa ni tura hmalak chu sorkar mawhphurhna a nih thu sawiin, "Kan rama industry din kawnga hmasawnna thlen leh kan ram hi India, Myanmar leh Bangladesh mai ni lo, south east Asia ramte insumdawn tawnna hmunpui - Indo-Myanmar-Bangladesh (with ASEAN) trade hub-a insiamte hi eng party pawh sorkar se kan ram leh hnam dinchhuah tak takna an duh a nih chuan thil tih theih ngei a ni," a ti bawk.