AR-in Sentinel Centre an ṭan dawn
Assam Rifles-in NIEDO nen ṭang duna Sentinel Centre an buatsaih tura zir turte an thlang tawh a, December 2023-ah zirna (coaching) an ṭan dawn.
Sentinel Centre hi Assam Rifles-in Mizo ṭhalai tam zawkin engineering leh medical entrance exam an paltlang theih nana coaching centre an buatsaih a ni a, bul an ṭan chho mek a; NIEDO an thawhpui bakah, Axis Bank-in an pui a ni. AR hotute chuan, Sentinel Centre coaching chu full-time residential programme a nih thu an tarlang.
Assam Rifles tarlan danin, Sentinel Centre-a luh tumin zirlai 186 an inziak lut a, October 27, 2023-a written exam-ah zirlai 128 inlanin, personal interview hmachhawn turin zirlai 84 an tling. November 6-7 khan interview neih niin, zirlai 51 an inlan a, coaching class kal turin zirlai 30 an thlan bakah, zirlai pariat chu reserve-ah an dah a ni.
Sentinel Centre-a inzir zirlaite chu medical leh engineering cource hrang hrang zir tur thlanna entrance test an paltlang ngei theih nan kaihhruai an ni dawn tih tarlangin AR chuan, "Mizoram ṭhalaite tan hmasawnna rahbi tuktu a nih ngei beisei a ni," an ti.