Bank-te hmalakna thlirho a ni

Kolasib District Consultative Committee, District Review Committee leh District Security Committee chu an chairman John LT Sanga, bawrhsap hoin nimin khan DC conference hall-ah an ṭhukhawm a; July-September, 2023 chhunga Kolasib district-a bank-te hnathawh thlir lêt a nih bakah, hmachhawpte sawiho a ni.

Ṭhutkhawma tarlan danin, financial inclusion plan hnuaiah Kolasib district-a mi 2,000 aia tlem chènna khaw 29 chu bank hrang hrangte'n chan insemin, bank kaltlanga hamṭhatnate an chhawr ve theih nan hmalakna kalpui a ni. July-September 2023 inkarah bank hrang hrang kaltlangin mipui hnena sum hman leh enkawl dan inzirtirna (financial literacy campaign) ṭum 14 buatsaih a ni bawk.

John LT Sanga chuan, hmasawnna tura bank-te'n mawhphurhna an neihte hria a, bank hmalakna a ṭhat lehzual theih nan theihtawp chhuah turin bank aiawhte a chah a, "Mipuite'n bank kaltlanga dil theih scheme chi hrang hrang an hriat zaua an hriat tam theih nan zirtirna neih tam a pawimawh," a ti a; thingtlang kilkhawr zawka awmte tan a tam thei ang ber awareness campaign nei tur leh data dik leh rintlak chauh thehlut ṭhin turin bank hotute a chah.

Bawrhsap hian National Bank for Agriculture and Rural Development (NABARD), Mizoramin Kolasib district chhunga kum 2024-25 chhunga agriculture kaihhnawih leh bank behchhana hmalak theihna tur ruahmanna a siam 'Potential Linked Credit Plan 2024-2025' chu a tlangzarh bawk.