Khawzawl district-ah inthlanpui vuakvêtah zu cheng nuai 13 hû man

Khawzawl District Narcotics Coordination Center (NCORD) chu nimin khan district bawrhsap K Lalrohlua kaihhruaiin a pisaah an ṭhukhawm a; MLA inthlanpui vuakvêt chhungin Khawzawl district-ah ruihhlo (drug) man a awm loh laiin, zu cheng nuai 13 hû man a nih thu tarlan a ni.

Khawzawl SP Lalchhuanthanga chuan, Khawzawl district chu NCORD-a district ti ṭha ber pawl a nih thu sawiin, "October leh November thla chhungin ruihhlo man a awm lo a, inthlan vuakvêtah zu cheng nuai 13 hû man a ni. Zu siamna hmun leh motor-te endikin special drive ngawrh taka neih ṭhin a ni," a ti a; October 9, 2023 aṭangin Special Drive Against Drugs and Liquor ngawrh taka kalpui a nih thu a sawi.

Ṭhutkhawmah hian kumin chhungin khaw 28-ah drugs awareness campaign neih tum a nih thu tarlan a ni a; December 4-8, 2023 chhungin Khawzawl Higher Secondary School-ah ‘Ruihhlo Do’ chungchang Awareness campaign neih an rél.

Khawzawl district-a khua 28 zinga awareness la neih lohna khua zawng zawngahte December 2023 chhungin awareness neih hman vek an tum thu Police hotute chuan an sawi bawk.