Vote chhiar hun atan inbuatsaih mek

MLA inthlanpuia vote tlate chhiar turin district-te an inpeih thawkhat tawh a; nimin khan vote chhiar tura inpuahchahna kal mekah district hrang hranga sorkar hotute leh vote chhiar kaihhnawiha mi pawimawhte an ṭhukhawm.

Champhaiah chuan district election officer (DEO) James Lalrinchhana, bawrhsap kaihhruaiin DC conference hall-ah political party aiawh te, counting agent te, candidate agent-te leh thuthar thehdarhtute an ṭhukhawm a; an mawhphurhna ṭheuh leh thil pawimawh dangte an sawiho.

Vote chhiar ní-ah thuthar thehdarhtute tan DC pisa ground floor-ah media centre ruahman a ni a, Champhaia cable TV pahnihte'n inthlan result live-in an tichhuak dawn tih tarlan a ni.

Kolasib DC conference hall-ah DEO John LT Sanga hoin vote chhiar huna venhimna kalpui dan tur te, counting area chhunga control room awmna tur te, media centre leh communication centre awmna turte sawiho a ni. IPRO leh media mi, Election Commission of India (ECI) aṭanga authority letter neite tan counting hall-ah luh phal a nih thu tarlan a ni a, video leh still thlalak chu IPRO kutah an dah.

Serchhip DEO David Lalthantluanga hoin vote chhiar dan tur leh inbuatsaihnate thlirho a ni a; khauh taka venhimna kenkawh a nih dawn thu tarlan a ni. ECI authority letter nei chanchinbumite tan counting hall bulah media centre leh candidate-te interview-na tur interview booth/podium siam a ni ang.

Lawngtlaiah chuan DEO Joseph H Lalramsanga kaihhruaiin SP, returning officer, assistant returning officer, election officer, political party aiawhte leh official dangte an ṭhukhawm. Election official-te leh political party aiawhte chuan December 1, 2023-ah vote tlate chhiarna tur Lawngtlai College an enho dawn a ni.

Mamit district-a candidate agent-te chu DEO VL Remliana kaihhruaiin counting room-a dan zawm turte hrilhfiah an ni. DEO chuan, ECI duh dan angin inkaihhruaina dante zâwm vek turin candidate agent-te a chah.