Hmeichhe zinga Governor ADC hmasa berin a hna a zawm

Governor Dr Hari Babu Kambhampati-a'n Indian armed forces aṭanga India rama Woman Aide-De-Camp (ADC) hmasa ber atana a ruat, Indian Air Force (IAF) squadron leader Manisha Padhi chuan nimin khan a hna a zawm.

Governor chuan, "He hna pawimawh tak thawk tura hmeichhe officer a tling hi thil chhinchhiah thak a ni mai lo a, mipate chauh tih theih anga mipui náwlpuiin an ngaih ṭhin, hmuh theih loh indaidanna bang su chhiain kawng hrang hrangah hmeichhiate an hlawhtling thei a ni tih tilangtu a ni," a ti.

Manisha Padhi hi IAF officer 2015 batch a ni a, nimin khan a hna Woman Aide-De-Camp a zawm. ADC hna a rawn thawh hma hian air force station pathum - Bidar, Pune leh Bhatinda-ahte a thawk tawh. IAF-a squadron leader hi Army-a major nen rank intluk an ni.