Myanmar sipai 30-te thawn kìr an ni

Myanmar sipai Siaha district-a November 28, Thawhlehnia rawn tlânchhiate chu nimin khan Tuipang aṭangin Myanmar lamah thawn kîr an ni.

Thu dawn danin, Siaha district-a Laki khua aṭanga hla vak lo, Myanmar Chin state-a Lailenpi khuaa Myanmar sipai camp chu November 19, 2023 aṭang khan Chin National Army kaihhruaiin mipui sipai - CDF-Mara, CDF- Lautu, CDF- Zophei, CDF- Matupi ten an bei a, November 24 khan an la.

Lailenpi-a Myanmar sipai 30 chu an tlanchhia a, November 28, Thawhlehni zing khan Mizoram chhungah an tlanchhia a, Laki khuaa Assam Rifles hnenah an inpe a ni.

Myanmar sipai 30-te chu Assam Rifles-te chuan lirtheiin Tuipáng (Tipi)-ah an hruai a, nimin chawhma lam khan an ram lama haw turin Tuipang aṭangin helicopter hmangin phurh chhuah an ni.

Tun hnaia Lailenpi leh a chhehvela inbeihnaah Myanmar sipai lamin indo thlawhnate leh bomb-te an hman avangin Siaha district-ah Myanmar tualchhung mi 300 vel an tlanchhia a; Laki, Zawngling, Chapui, Ahmyipi, Mobyu, Siasi, Khopai leh Theiva khuaahte an lut hlawm. Mipui sipaiin Lailenpi sipai camp an lak hnuah raltlan eng emaw zat chu an khaw lamah an lêt nia thu dawn a ni bawk.

Tarlan tawh angin, Rihkhawdar leh Ṭiau Khawmawi khuaa Myanmar sipai camp-te Chin Defence Force (CDF)-te'n November 13, 2023-a an lâk avangin Myanmar sipai 42 chu Mizoramah rawn tlânchhiain, Mizoram police hnenah an lo inpe tawh a; November 13 khan Hnahlan helipad aṭangin Myanmar lama haw turin Assam Rifles-in an thawn kîr.

Chin state tho Tuibual khuaa Myanmar sipai camp pawh Chin National Defence Force (CNDF)-te'n November 14, 2023 zan khan an la a, camp-a awm Myanmar sipai 29-te chu Mizoram lamah tlanchhiain, November 16-ah Saikhumphai Ṭiau kài an thleng a, an ralthuamte nen Mizoram police kutah an inpe a ni. Mizoram police-te'n Assam Rilfes hnenah an hlan chhâwng a, AR-te chuan November 19 khan Vaphai aṭangin helicopter-in an thawn chhuak a ni.

November 2023 chhunga Myanmar sipai Mizorama rawn tlanchhe tawh chu mi 101 an chuang tawh a ni.