Adolescent friendly health clinic-ah 2023-24 chhungin 17,446 ziak lut tawh

Naupang leh tleirawl, kum 10-19 inkarte'n rilru leh taksa hrisel an neih theihna tura hmalakna, Rashtriya Kishor Swasthya Karyakram (RKSK) hnuaia youth clinic (adolescent friendly health clinic)-ah sorkar kum kal mek 2023-24 chhungin mi 17,446 ziah luh an ni tawh.

NHM aṭanga thu dawn danin, sorkar kum kal mekah April-October 2023 chhungin RKSK youth clinic-ah mi 17,446 ziah luh an ni tawh a; counselling pek mi 15,841 an awm tawh a, hmun danga thawn (refer) mi 7,586 an awm bawk.

RKSK (National Teenage Health Programme) hi kum 2014-ah hawn a ni a, naupang/tleirawlte hriselna lama hmasawnna tura duan niin, kum 10-19 inkar a huam. Mizoramah chuan high focus district pali leh normal district pakhatah kalpui mek a ni a, chungte chu Champhai, Mamit, Lunglei, Lawngtlai leh Siaha district-te a ni.

RKSK thil tum langsar zualte chu - naupang/tleirawlte hnena ei leh in ṭha chungchang zirtir, mipat hmeichhiatna chungchanga hriselna leh kawng dik kawhhmuh, rilru hrisel an neih theihna tura hmalak, ruihhlo laka an fihlim theihna tura hmalak, natna inkai chhàwn theih loh laka an fihlim theihna atana zirtirte a ni.

RKSK hnuaiah hian tleirawlte zingah thisen tlâkchhamna (anaemia) a tlem theih nan Weekly Iron Folic Acid Supplementation (WIFS) kalpui a ni bawk a, WIFS hnuaiah hian Mizorama sikul 1,632 leh anganwadi centre 2,244 tuam a ni tawh.

WIFS hmang hian middle school aṭanga higher secondary school zirlai 89,402 tuam a ni tawh a, chu chu target mi 95,167 aṭangin 90.53% a ni.

RKSK hnuaiah hian Peer Education Programme hnuaiah tleirawlte'n thla tin Rs 50 hû sabawn/hrûkpuan/towel/sanitary pad an dawng thei a; Menstrual Hygiene Scheme hmangin sikul leh biak-in ṭhenkhatahte tleirawlte hnenah hmeichhe thla tin bi leh thianghlimna chungchang zirtir ṭhin a ni bawk.