China-a pneumonia léng mek laka inven dan tur sawiho a ni

Health & Family Welfare department hotute chuan China rama pneumonia léng mek laka Mizoram a him theihna tura hmalak dan tur nimin khan Secretariat conference hall-ah an ngaihtuah a; hri chu India ram tan hlauhthawnna tur awm rih lo mah se, ṭhenawm ramte thlithlai reng a ṭul thu an sawi.

Health secretary Esther Lalruatkimi chuan, China rama pneumonia léng vangin nausên thi an awm thu leh sorkar laipuia Ministry of Health & Family Welfare-in a ṭul anga inpuahchah turin state sorkarte a hriattir thu a sawi a, "Mizoram pawh kan lo inbuatsaih a ngai a, Ministry aṭanga lehkha rawn kalah pawh tun dinhmunah chî-àina tur a awm loh thu an ziak a ni," tiin, chî-âi lo turin mipui a chah.

Hma lam hun hriat lâwk a nih loh avangin phak tâwka lo inbuatsaih a pawimawh thu sawiin Esther Lalruatkimi chuan, "Covid-19 lèn laia inkaihhruaina dante kha fimkhur thilah zawm tur chinte ngaihtuah a, health sector-a thawktute dinhmun leh damdawi, hmanraw neihte lo inhre chiang tura hriattirna kan dawng," a ti.

Ṭhutkhawmah hian, China rama pneumonia léng chu zir chian mek a nih thu an sawi a; India ram tan hlauhthawn tur a awm rih loa a lan thu te, inthlahdah loa India ram chhung, a bikin Mizoram hnaih state-te dinhmun thlithlai reng a ṭul thu te, Health department hnuai thawktute dinhmun bakah, damdawi-in hrang hrang, damdawi hmanruate leh damdawi kawl mek dinhmun te, a ṭul anga inthuam chak dan turte sawiho a ni bawk.

Meeting-ah hian Mizoram sorkara special secretary Vinay Kumar, Health principal director Dr Vanlalsawma leh HFW department hotu dangte an tel a ni.