Zokhawtharah ráltlân an la tam; PDF-te'n Ṭiau Khawmawi an luah

Peoples' Defenece Force (PDF) leh Myanmar sipaite tun hnaia an inkah vanga Zokhawthara tlânchhiate chu mi eng emaw zat an khaw lamah kîr leh tawh mah se, let lo tam tak an la awm. Zokhawthar epa Myanmar khaw hmasa ber Ṭiau Khawmawiah chuan Myanmar sipai an awm tawh lo a, PDF-te'n an luah tawh.

PDF leh Myanmar sipaite Khawmawi leh Rihkhawdar vela an inbeih tur thuthang avangin Myanmar aṭangin November 12 aṭangin Khawmawi leh Rihkhawdar aṭangin mi eng emaw zat chu Zokhawtharah an tlânchhia a; Myanmar sipaite leh PDF-te chu November 12 zan aṭangin Rihkhawdarah an inkâp a, November 13 chhunah PDF-te'n Myanmar sipai camp an la.

Rihkhawdar camp an lak hnuah PDF chuan Khawmawia Myanmar sipai camp pawh November 13-ah an bei leh a, tlai lamah an la leh thei a ni.

Zokhawthar aṭanga Vanglaini thu dawn danin, PDF-te'n Khawmawi leh Rihkhawdar an thunun hnuah ráltlân zinga a zatve vel chu an khaw lamah an kîr leh tawh a, mahse, Myanmar sipai an chêt leh hlauin mi eng emaw zat chu Zokhawtharah an la awm. PDF-te chu tun hmaa Myanmar sipaite awmna ṭhin, Myanmar ram lama Ṭiau lei tawntirhah leh hmun hrang hrangah an awm.

PDF-te'n Khawmawi an lak hnuah Zokhawthar aṭanga Myanmar lama kal duhte an zalen lehzual tawh a, PDF-te'n harsatna an siam ngai lo. Zokhawthara nu pakhat chuan, "Tun hma lakah chuan nuam tawh tak a ni, ṭawng inhre pawh vek kan ni tawh a, kan zalen halh tawh," tiin Vanglaini a hrilh.

Ruihhlo chungchanga zawhna chhangin Zokhawthar khawtlang hruaitute chuan, "Ruihhlo chungchangah PDF an strict viau. An ram chhung lam mi ruihhlo tawlh an hriatte chu manin, tan-in an siamah an dah ṭhin," an ti a; ruihhlo tawlh tumte tan PDF an awm tâk avangin an zalen lo sawta an rin thu an sawi.