Tleirawl pawngsualtu thiam loh chantir

Kolasib District Court-a Fast Track Court chuan mahni sikul naupang pawng­sualtu Vanlalrawngbawla (31) s/o JC Lalrinliana, Kawnpui Vengthar chu nimin khan thiam loh a chantir a, hrem dan tur chu November 29, 2023-ah puan a ni ang.

Thu dawn danin, January 15, 2022 khan Kawnpui khaw nu pakhat chuan a fanu kum 17 mi chu an sikul headmaster-in a pawngsual tia puhin, dan anga hma la a, chhui chiang turin Kawnpui Police Station-ah FIR a thehlut a; chumi bawhzui chuan Kawnpui police-te chuan pawngsualtua puh Vanlalrawngbawla (31), Kawnpui Vengthar chu an man a, Protection of Children From Sexual Offences Act, 2012 (POCSO Act) Section 6 hnuaiah thubuai ziah luh a ni.

Pawngsuala inpuhna thubuai hi sub-inspector Zorammawii'n a chhui a, thubuai thehluttu leh pawngsual tuartu nia sawite thu ziahfiah an nih bakah, sikula zirlai ṭhenkhatte pawh thu zawhfiah an ni. Pawngsual tuartu nia sawi chu Kawnpui damdawi-in (PHC)-ah enfiah a ni bawk.

Police chhuina report kimchang (charge sheet) leh thuhretu hrang hrangte thu sawi te, ukilte thu sawite ngaihthlak a nih hnuah Kolasib Fast Track Court chuan Vanlalrawngbawla chu a thawhna sikula zirlai, hmeichhe tleirawl pakhat a pawngsual ngei tih finfiah a nih avangin thiam loh a chantir a, judge R Vanlalena chuan nimin khan thutlukna a puang.

Fast Track Court thu angin Vanlalrawngbawla chu nimin vêk khan Kolasib District Jail-ah dah luh a ni a; amah hrem dan tur chu November 29, 2023-ah puan a ni ang. Hmeichhe pawngsualtu, thiam loh chang chu a rei lo berah kum 20 chhung tàntir theih a nih thu, thu dawnna chuan a tarlang.