Myanmar sipai 29 thawn haw

Myanmar-a mipui sipai, Chin National Defence Force (CNDF)-in November 14, 2023 zanah Chin state chhung Tuibual khuaa Myanmar sipai camp an lâk hnua Mizoram lama rawn tlanchhia Myanmar sipai 29-te chu Assam Rifles-in nimin khan Myanmar lama haw turin an thawn chhuak.

Tuibual khuaa Myanmar sipai 29-te chu November 15 khan Mizoram lam pan mahse kawng an bo avangin an thleng thei lawk lo a, November 16, Ningani chawhnu dar 2 pelh hretah Vaphai khuaa veng pakhat Saikhumphai Ṭiau kài an thleng a, an ralthuamte nen Mizoram police kutah an inpe a ni.

Myanmar sipaite chu Mizoram police-te chuan Assam Rilfes hnenah an hlan chhâwng nghal. Assam Rifles aṭanga thu dawn danin, Myanmar sipaite chu Assam Rifles-te'n Myanmar lamah thawn kìr tum mah se, khuain a zir loh avangin an thawn mai thei lo a, nimin chawhma dar 11 vel khan Vaphai aṭangin helicopter-in an thawn chhuak a ni.

Chin National Organisation Vice President sawi danin, CNDF-te'n November 14, 2023 zanlai vela Tuibuala Myanmar sipai camp beinaah, darkar 4 vel an inbeih hnuah Myanmar sipaite chu CNDF chuan inpe turin an hriattir a, Myanmar sipaite chu CNDF kuta inpe duh loin, Mizoram lam panin an tlanchhia a ni.

Chin state tho, Rihkhawdar leh Ṭiau Khawmawi khuaa Myanmar sipai camp-te pawh Chin Defence Force (CDF)-te chuan November 12, 2023 aṭang khan beiin, November 13 khan an la a; inbeihnaah hian Myanmar sipai 42 chu sahimna zawngin Mizoramah rawn tlânchhiain, Mizoram police hnenah an lo inpe tawh a ni. Khawmawi lam aṭanga Myanmar sipai rawn tlânchhiate chu Assam Rifles-te'n November 13 vêk khan Hnahlan helipad aṭangin Myanmar lama haw turin an thawn kîr tawh. Heti hian tun hnaia Myanmar sipai Mizorama rawn tlanchhe tawh chu mi 71 an ni a, Ministry of External Affairs thu angin Assam Rifles-te'n Myanmar lamah an thawn kîr vek tawh a ni.

Hetih lai hian, Tuibuala inkahna vanga Leilet, Myanmar aṭanga Mizorama rawn tlânchhia mi 600 vel chu an khuaah an kîr leh deuh vek tawh nia thu dawn a ni.